Mizoramah Buddhist hmunhma?

2026-27 atana India ram budget tur an pharh tawh a, tunlaia India ram titi pakhat a tling ang. Mizoram a lan ve dan chu, Buddhist hmunhma humhalhna turah a lang.
February ni 1-ah union finance minister Nirmala Sitaram-i’n budget hi a pharh a, hmarchhak state-ah Buddhist hmunhma humhalha tihhmasawn tum a nih thu sawiin, chutah chuan Mizoram pawh a lang.
Arunachal Pradesh, Sikkim, Assam, Manipur, Mizoram leh Tripura-te tan Scheme for Development of Buddhist Circuits siam tum a nih thu a sawi a ni.
He scheme hnuaiah hian Buddhist temple leh monastery te humhalha tihhmasawn tum a nih thu a sawi a, sakhaw thil zinte ngaihtuah an nih tur thu a sawi.
Hmarchhak state thenkhatah Buddhist hmun hlui leh an hmun pawimawh a awm nual a, Arunachal Pradesh-a Tawang Monastery chu India rama Buddhist monastery lian ber pawl a ni. Sikkim khawpui Gangtok-a Rumtek Monastery leh Enchey Monastery te chu Buddhist hmun hmingthang a ni a, Assam-a Hayagriva Madhava Temple pawh an hmun pawimawh a ni. Mizoramah erawh chutiang a awm hriat a ni lo.
Mizoramah hian Buddhist sakhaw zuitu chu an awm a, temple pawh an nei. Mahse history-a hmun pawimawh leh lian tham erawh hriat a ni lo. Mizoram a lang ve na a, Scheme for Development of Buddhist Circuits hnuaia hnathawh vak tur a awm lo tihna pawh a ni thei.
Union budget-ah hian hmarchhak hmasawnna atan cheng vaibelchhe 11,486 dah a ni a, economic lama hmasawnna atan te, inkalpawhna lam atan te, vantlang hmun siamna atan te a nih thu a sawi.