Mizoramah CBI an che thei em?

CBI chungchang hi Mizoram politics-ah inbeihna a tling reng tiin a sawi theih ang. CBI rawn che ta se, thil a fel duak tura ngaite pawh a awm theih ang. Tunah pawh party mite leh politics ngaihvente titi ber pakhat chu CBI chungchang hi a ni ngei ang.
Lengpui Airport bula ram lei chungchangin ngaihven a hlawh a, politics-a inbeihna a ni mek. Chu chu CBI chungchang a hring a, ram lei chungchang tluk zetin CBI chungchang hi a ring a ni ber e.
December ni 28, 2023 khan Mizoram sorkarin gazette-ah notification a chhuah a, vigilance department secretary-in Mizorama an duh an chhui phalsakna ‘consent’ pek an nih thu hi a chhuah a ni. Mahse hei hi a hnu lawkah sut leh a ni.
July ni 1, 2024-ah khan gazette-ah CBI phalna pek tawh sut leh thu hi chhuah a ni a, notification-ah hian Mizoram sorkarin CBI hi Mizoram puma thil chhui phalna pek a lo nih tawh thu tarlan niin, mahse Mizoram sorkar hnuaia thawkte chhui chungchang erawh hei hian a huam lo ang tia tihdanglam a nih thu tarlan a ni. Mizoram sorkar hnuaia mite chu Mizoram sorkar phalna lova chhui theih an ni lo ang tih a ni.
2023 December ni 28-a CBI zalenna pek an nih khan chief minister-in instagram-ah a post nghal a, notification thlalak a post bakah “CBI consent pawh approve a ni ta e,” tih a ziak tel.
Chief minister Lalduhoma hian an sorkar hma atangin CBI chungchang hi a lo sawi tawh thin a, July ni 15, 2023-a ZPM-in Armed Veng South Community Hall-a mi thar an lawmluh tum pawhin, “Kalphung thar hmangin kan do dawn. Lokayukta kan thuam chak ang a, CBI kohluh pawh kan sawi, PAC-ah kan rel tawh. Kan police kan ring lo tihna a ni lo. Society-a inpawh tak tak, kohhran khata lawi, pawl hrang hranga inhmangza inchhui hi tu tan mah a nuam lo. Chutiang ngaihtuah ve lo CBI kan ko lut dawn a ni,” a lo ti tawh. Chumi hma daih, 2017 July ni 30-ah pawh MBOCWWB chungchangah CBI chhuitir a phut thu an party office-ah a sawi.
Term kal meka Assembly Session hmasa ber, 2023 December ni 12-14 chhunga neihah pawh khan CBI chungchang hi a sawi a, “Central Bureau of Investigation (CBI) hnenah general consent kan pe dawn, chief secretary pawh instruction ka pe tawh,” a ti. Chumi hnuah general consent chu pek a ni ta a, thla ruk a liam tihah an sut leh ta a ni.