Mizoramah cocoa chin pun kawnga hma lakpuiah sawm

Ni hnih awh tur National Conclave on Cocoa 2025 chu Nilaini khan Agriculture University Jorhat-ah tan a ni a. A hawnnaah Mizoram Agriculture & Farmers Welfare minister PC Vanlalruata chu khuallian a ni.
National Conclave-ah hian India ram state hrang hrang atangin kuthnathawktute leh scientist an fuankhawm a. PC Vanlalruata chuan India ramin chocolate siamna atana cocoa a mamawh zat chu metric ton 120000 a nih laiin, tuna India-in a tharchhuah chu MT 22000 chauh a ni a, kan mamawh zaa 80 chu ram dang atanga lakluh a nih avangin sawrkar laipui pawhin cocoa plantation zau zawka kalpui a nih theihna turin hma a la mek zel tih a sawi a ni.
“Eng thlai pawh ching dawn ila, a pawimawh hmasa ber chu farmer-ten a chi tha an dawn ngei theihnana hma lak a ni,” tiin, hemi kawngah hian sawrkar laipuia Directorate of Cashew & Cocoa chu thawhpuiah sawmin, directorate hotute chu Mizoram tlawha Mizoram farmer-te zirtirna pe a, Cocoa nursery dinpui turin a sawm. Directorate hotute chuan minister sawmna hi tihhlawhtlin ngei an tum thu an sawi a ni.
Agriculture & Farmers’ Welfare minister hian Ningani khan Central Plantation Crop Research Institute (CPCRI) Guwahati tlawhin principal scientist Dr Alpana Das leh a thawhpui scientist-te nen an inkawm.
CPCRI hi cocoa research centre a ni a, grafted seedlings siamna a ni bawk. Cocoa chungchang power point presentation hmangin an lo hrilhfiah a, hemi hnu hian field-a hma an lakna an tlawhpui. Mizoram-ah cocoa plantation kalpui a nih dawn chuan theihtawp chhuahpui an inhuam tih an lo hrilh a ni.
Scientist-te sawi danin, kum 35 kalta atang khan cocoa zirchianna an lo kalpui tawh a, a seedlings tha thawnchhuah kawngah Meghalaya leh Arunachal Pradesh sawrkar nen MoU an ziak dawn. Agriculture minister hian Mizoram sawrkar nen thawhdun puiah sawmin, grafted seedlings pawh pilot project atan engemawzat pek an lo tiam a ni.
CPCRI scientist-te chuan cocoa chi hrang hrang an zirchianna atangin hmarchhak bik tana cocoa chin tur variety tha bik an hmuchhuah thu an lo hrilh a, zirchiang hmasa loa kuthnathawkten an hmuh ang ang an ching thin hian a nih tur ang an tharchhuah loh phah nasa thin tih an sawi.