Mizoramah CPA Conference nei dawn

Mizoram chuan September 27 & 28 chhung hian ‘21st Annual Conference of Commonwealth Parliamentary Association, India Region Zone-III’ a thleng dawn.
Ni hnih awh tur Annual Conference of Commonwealth Parliamentary Association hmang tura palaite an thlen kim ni – September 26 tlaiah Executive Committee an thukhawm nghal anga, September 27 chawhmaah Lok Sabha speaker Om Birla chuan Mizoram State Legislative Assembly Secretariat MLA Library-a Archive Cell thar a hawng anga, chumi hnuah CPA Annual Conference hman tan a ni ang.
Mizoram Assembly speaker Lalbiakzama’n palai lawmna thu a sawi zawhah Nagaland Assembly speaker leh CPA Zone-III chairman Sharingain Longkumer chuan keynote address a sawi anga; Mizoram chief minister Lalduhoma, Rajya Sabha deputy chairman Harivansh Nayaran Singh leh Lok Sabha speaker Om Birla ten thu an sawi dawn a ni.
A ni khatnaa Plenary Session-ah an ngaihtuah leh sawiho tur thupui chu ‘Inclusion of the Northeast Region in the Indian-ASEAN Vision for Trade and Cooperation’ a ni anga, a ni hnihnaa an thupui sawiho tur chu ‘Merging the Ministry of DONER with NEC for better strategic planning and coordination of various projects in the region’ a ni ang. Conference neih chhung hian palaite tan cultural programme buatsaih thin a ni dawn a ni.
Conference thlen tur inbuatsaihna atan hian Inrinni khan Mizoram Legislative Assembly commissioner & secretary Vanlalthantlingi hoin a kaihhnawih sawrkar official-te an thukhawm a ni.