Mizoramah HIV+ sing 3 chuang Inpawlna atanga kai an tam ber

Mizoramah HIV kai mi sing thum chuang an awm tawh a, inpawlna atanga kai chhawng an tam ber a, mipa zingah anpui kawp thin kai an tam tial tial tih sawi a ni.Mizoram State AIDS Control Society project director Dr Jane R Ralte sawi danin, October 1990 atanga March 2025 thlengin Mizoramah HIV kai hmuhchhuah 32544 an awm tawh a. Kum kalta, April 2024 atanga March 2025 chhung khan HIV hrik kai 2021 hmuh thar awmin, chu’ng zinga 1302 (68.13%) chu inpawlna atanga kai an ni. Kawppui nghet (nupa/ inngaizawng) inkara HIV inkai an tam ber a, tawn sabawp (casual sex partner) atanga kaiin an dawt; mipa mahni anpui kawp atanga HIV inkai hmuhchhuah an tam zel tih sawi a ni.
2024- 2025 sawrkar kuma HIV hmuhchhuah zinga 83.47% chu thalai kum 15- 49 inkar an ni. “Hei hian HIV laka invenna atan sex hman apianga condom hman ziah a pawimawhna leh kan thalaite pawh condom pai reng tura inzirtirna uar lehzual a pawimawh zia a tilang a ni,” MSACS project director hian a ti.
Zirtawpni khan Central YMA hruaitute leh MSACS hotute chu Mizorama HIV darh zel tur ven kawngah an inrawnkhawm a. Central YMA president Lalhmachhuana chuan MSACS chu theihtawp chhuahpui an duh tih a sawi a. Ruihhlo ngaite chauh niloin, sum nei leh mi changkang deuh anga lang zingah he natna kai thei dinhmuna ding leh kai hlauhawma khawsa an awm tih a sawi a ni.
Zirhonaah hian ruihhlo ngaite an inchiu thin aiah a eia ei chi (Oral Substitution Therapy – OST) damdawi pawimawhna leh ruihhlo ngaite tana a thatna, HIV kai hlauhawma khawsa thinte enkawlna leh zirtirna hmun – Drop In Centre veng hrang hranga kalpui mekte a nihna tur anga tha taka kalpui a nih theihnan Central YMA leh vengtina YMA Branch-te nen thawhho leh tanrual a pawimawhna, ruihhlo ngaite uluk taka HIV laka invenna kawng, an ruihhlo ngaihnaa harsatna an tawh tihhniamna tura uluk taka Drop In Centre kaltlanga enkawl leh zirtir a pawimawhna sawiho a ni.