Mizoramah Independence Day hmang Tlin lohna kan ngahin kan insit em em: – Chief minister

India ram hmun dang rualin Zirtawpni khan Independence Day vawi 79-na chu Mizoram hmun hrang hrangah hman a ni a. Chief minister Lalduhoma hoin Aizawl Lammualah hman a ni.
Independence Day champhaah ram chhung leh pawna Zofate duhsakna chibai a buk tih chief minister hian a sawi a. Zalenna kan hmuh theihnana beitute, martar-te leh ram hruaitute zahna chibai a buk bawk tih a sawi.
“Kan ram zalenna humhim tur leh hma kan sawn zel theihnana beitu, Prime minister Narendra Modi leh a thawhpuite kut tichak a, ram tana rinawm tur leh inpumkhatna vawng tha a, state ralmuang ber kan nihna vawngnung zel turin mipui ka sawm a ni,” a ti.
A sawrkarin hmachhawp tam tak la tih loh an nei a. An tih duh loh vang emaw aan tih theih loh vang emaw ni loin, miten kum 15 chhungte, kum 20 chhungtea an tih theih loh kha anni’n kum 1 leh thla 8 chhung lekin an ti hman bik ngang lo zawk tih Lalduhoma hian a sawi.
“Khawvel footballer tha ber te zing ami Cristiano Ronaldo leh Lionel Messi te meuh pawhin, vawi 33 leh vawi 31 ve ve penalty an pet goal thei bik loa. Keini, experience la nei lo phei hi chu tlin lohna kan ngahin kan insit em em a.
CM thusawi dang thenkhat:
8 Corruption chu sawrkar hmalakna tithuanawptu ber a nih avangin, ngaihpawimawh hmasakah an neih a. Corruption do dan thar an duang.
8 Hun eiru awm loa sawrkar hnathawkten dik taka hun an vawn theihnan biometric attendance leh Kai apps system duan a ni a. Office tinin tha taka kalpui tura beisei an ni.
8 Mipuiin harsatna emaw complaint emaw an neih chu an awmhmun atanga online-a awlsam taka an thlen theihnan ‘Mipui Aw’ portal version tha zawk siam a ni a. Complaint 900 dawn tawh niin, bawhzui nghal zel an ni.
8 Leiba tlingkhawm vaibelchhe 13584.80 neiin bul an tan a. Inrenchem puangin a kum khatna (2023- 2024) chu insawh ngheh kumah an hmang a, kum khat chhungin leiba hi vbch. 679-in a tlahniam hman. A kum hnihna (2025- 2026) chhung hian vbch. 1003 a tihniam leh tumin an bei mek.
8 K Deposit lakchhuah tawh zat hi vbch. 1773 chuang a tling tawh a. Sawrkar sum mimal account-a lo dah thin chu tihtawp a ni. Department pakhatin bank pakhat aia tamah account hawn phal a ni lo.
8 Inrenchem zarah nikum kum bul khan sumfai hman bang (opening balance) vbch. 520.65 an nei thei a. Kumin kum bul tannaah opening balance vbch. 1099.93 an nei thei tawh.
8 Health care bill tang zawng zawng rulh zawh vek a ni a. Health care scheme thar hnuaiah state chhungah a thlawnin damlo 25588 enkawl an ni tawh a, cheng nuai 3396 chuang pek chhuah tawh a ni.
8 A thlawnin mitthi ruang 1060 phurh a ni tawh a, cheng nuai 107 chuang sen a ni tawh.
8 Tender reng reng contractor emaw approved consultancy firm emaw ni lo tan chhan theih a ni loa, pek theih an ni lo. Tender lem pawh pakhatmah a awm ngai lo.
8 CM phalna la hmasa loa departmental work thawh leh restricted tender tih phal a ni lo. Amaherawh chu, 15th Finance Commission hun tawp lamah kan awm mek avangin SASCI hnuaia hna chu sawrkar laipuiin a thawh zawh hun tur a tuk a, restricted tender-a tih phal a ni. Restricted tender reng rengah chhangtu pathum tal an awm tur a ni a. Hna hmanhmawh bik a nih loh chuan open tender uar zel tum a ni.
8 Finance department hriatpui loh leh work order, administrative approval, expenditure sanction awm loin eng hna mah thawh phal a ni tawh lo.