Mizoramah khualzin an pung

Tun hnaiah Mizoramah khualzin (tourist) an pung a, India ram hmun dang atanga Mizorama zin leh foreign atanga zin an pung ve ve.
Session liam taah tourism minister Lalnghinglova Hmar-in Champhai South bialtu Lt Col Clement Lalhmingthanga zawhna chhangin tun hnai kum nga chhunga Mizorama zin khualzin zat hi House a hrilh a, Covid-19 len lai pawhin khualzin hi an pung tih a lang.
2020-21 khan a hma kum aiin khualzin zat hi a tlem a, 2020-21 hi Covid-19 vanga inkharkhip lai, khawvel ram dangah pawh khualzin a awm theih loh lai vel kha a ni. Hemi kumah hian India ram hmun dang (domestic) atangin Mizoramah mi 20474 an zin a, foreign atangin mi 90 an zin. Hemi kum hian a hma kum aiin khualzin zat hi -87.28%-in a tlahniam a, a kum lehah a pung leh nghal.
2021-22 chhungin khualzin 132616 an awm a, a punna hi a tam tham hle. A kum leh 2022-23 chhungin mi 222008 an awm a, a pung leh. 2023-24 khan a tlahniam hret a, khualzin zat hi 219114 niin, -1.30%-in a tlahniam. 2024-25 khan a pung leh dawrh a, 139.50%-in a pung, khualzin zat hi 524784 a ni.
Tun hnai kum nga chhungin foreign atanga Mizorama zin an pung ziah a, India ram hmun dang atanga zin zat erwh 2023-23 khan a tlahniam.
Khualzin zat
Kum Domestic Foreign Total
2020-21 20474 90 20564
2021-22 132099 517 132616
2022-23 218457 3551 222008
2023-24 215230 3884 219114
2024-25 518873 5911 524784