Mizoramah Meitei him, tlanchhiate pawh kir leh tawh

On Jun 22, 2023 11 0

Manipur-ah Zo hnahthlakte leh Meitei an buai a, chutih laiin Mizorama Meitei-te chu an him. Hlauva tlan hawte pawh Mizoramah an kir leh tawh tih thu dawn a ni. “Kan him e. Tuman min tibuai lo a, personal-a min tibuai kan hre lo a, kan ralti lo,” tiin All Mizoram Manipuri Association vice president Ranbir Singh chuan The Aizawl Post a hrilh a, “Thlamuang takin kan awm a, Mizote chungah kan lawm a ni,” a ti bawk.
Manipur-a Zo hnahthlakte leh Meitei-te buaina hi April thla tawp lamah a intham a, May ni 3 atangin buai tak takin an buai. Mizorama cheng Meitei zingah pawh a tir lamah hian tlan haw an awm.
Ranbir Singh chuan May thla tir lama tlan hawte hi Mizoramah an let leh vek tawh tih a sawi a, a zat chiah hriat theih chu a ni lo a, mahse an rawn let leh vek tih chu an hriat dan a nih thu a sawi.
Tlan hawte pawh hi an him loh vanga haw an ni lo a, an chhungte’n an ngaihtuah a, haw turin an ti a, chumi pressure vanga haw chu an ni tih a sawi.
Tun hnaiah chhungkaw 13 chu Mizoram atangin Manipur-ah an haw tih a sawi a, a then chu an hnathawhna lamah an chawlh lai a nih thu, chawlh hmanga haw an nih thu a sawi. A then chu thlamuan loh vanga haw chu an ni tho tih a sawi.
“La awm rei lo, Mizote hre chiang lo hian an hlau a, an haw a, mahse an rawn let leh a. Mizote hrechiang chuan tlan haw an tum lo,” Ranbir-a chuan a ti a, “Mizoram chu peaceful state a ni a, a ralmuang a, a zalen a ni tih hi a awm reite chuan kan hria,” tiin, “Mizote hi mi dang tiduhdah chi an ni lo a, an violent lo. Mi dangin an ti hmasa a nih loh chuan Mizoin tharum an thawh lovin kan hria,” a ti bawk.
Mizoramah tibuaitu an awm loh thu leh an him thu hi Manipur-a an chipuite hnenah pawh a theih ang angin an sawi a, NGO-te an hrilh a, Manipur chief minister hnenah pawh an sawi tih te a sawi a, Manipur chief minister-in tun hnaia Mizoram chief minister a rawn bia pawh kha, Mizoram Meitei-te’n Mizorama an him thu an sawi vang nia an hriat thu a sawi.
All Assam Manipuri Youths’ Association te’n tun hnaiah Mizoram pawhtu national highway dan an tum chungchangah Ranbir-a chuan, he thil hi pawi an tih thu leh an hriat veleh dang lo tura an ngen thu a sawi.