Mizoramah Rahul Gandhi

Ram mipui nen inlaichinna tha zawk leh an harsatna leh buaina ngaihthlak sak a, an hrilhhriat theih nana ramchhung hmun hrang hrang fangkualtu Rahul Gandhi chuan October 16 hian Aizawl a tlawh dawn tih All India Congress Committee (AICC) thupuangtu Mathew Antony chuan a sawi.
‘Bharat Jodo Yatra’ a kalpui mekah Rahul Gandhi hian India ram hmun hrang hrangah ke in km. 4000 chuang a kal tawh tih Mathew Antony hian sawiin, Aizawlah pawh Chanmari kawn atanga Raj Bhavan thleng kawng a zawh dawn tih a sawi. Kumin inthlanpui neih turah Mizoramin hma a sawn theih nan Mizo mipui ngaihdan ngaihthlak sak tura lokal tur a ni, tiin, “Mipui nen inlaichinna tha zawk leh ram hmasawnna atana thawhona tha zawk a awm theih nana lo kal a ni,” a ti.
BJP kaihhruaina hnuaiah ram mipui tih thlabarin an awm bakah mipui inkarah inrem lohna tur chawkchhuakin, sakhaw zalenna thlenga an tih tawp mek thu AICC thupuangtu hian sawiin, “Rahul Gandhi hi mipui ngaihdan leh aw ngaipawimawhin ‘mipui aw’ a ni,” a ti. BJP kaihhruai state Manipur-a Zohnahthlakten buaina an tawhah pawh Prime minister leh BJP hruaituten an ngaihsak loh lai pawhin Rahul Gandhi chuan a hmun ngeiah tlawhin an harsatna leh hrehawmna tawh hmuhpui bakah Parliament-ah a auchhuah pui tih a sawi a ni.