Mizoram Football Association (MFA) leh Reliance Foundation tangkawp chuan Mizoramah Reliance Foundation Development League an buatsaih dawn a; kum 21 hnuai lam player-te inelna niin, India rama a tithate tan English Premier League club-te nena inkhelhna hun a inhawng ang.
MFA chuan he inelna hi March thla tira Aizawla khelh turin a ruahman a, team paruk tan a tel theih ang.
Team tel duh tan
Reliance Foundation Development League-ah hian MFA leh District Football Association hnuaia registered club tu pawhin tel dilna thehluh theih a ni a, Mizoram Premier League club ni kher lo tan pawh tel theih a ni.
Dilna form hi MFA office, City Park-ah February 8, 2023 atangin Rs. 100 pea lakchhuah theih a ni a, February ni 10 tlai dar 4:00 hmaa thehluh tur a ni.
Tute nge khel thei?
Reliance Foundation Development League hi under 21 inelnaa kalpui tur a ni a, chutihlaiin under 23 player pathumte playing XI-ah an tel thei thung ang.
-- Advertisement --
Under 21 player hi January 1, 2002 leh chumi hnu lama piang chin pawm an ni a, under 23 player-ah hian January 1, 2000 leh a hnu lama piang chin an tel thei ang. Kum dik taka kalpui tur a ni a, original birth certificate endik tur a ni ang.
Squad-ah hian mi 40 aia tam lo ziahluh theih a ni a, under 23 player hi 10 aia tam an awm thei lo a, inkhelh niin match day squad-ah mi panga ziahluh theih a ni ang a, pathum aia tamin a rualin an khel thei lo thung.
Inkhelh dan tur Team parukte hi tum hnih an inkhel kual chhuak dawn a, a tawpa a titha pahnihin National Cham-pionship an khel thei ang.
India rama hmun pakua thlan bikah he inelna hi kalpui a ni dawn a, hei hi ‘National Qualifiers’ tia dah a ni. Hmun hrang hranga a titha team pahnih theuh hi National Cham-pionship-ah an khel ang a, India rama club titha palite hi international tournament-ah an khel dawn a ni.
Reliance Foundation Development League-a a tithate tan hian an kal zelna turin international tournament Next Generation Cup siam a ni a, hei hi Premier League leh Indian Super League tangkawpin an buatsaih a ni.
Kum 2022 khan Next Generation Cup-ah hian Reliance Foundation Development League lama titha pahnih – Bengaluru FC leh Kerala Blasters-te an khel a, Premier League atangin Tottenham Hotspur, Leicester City, West Ham United, Crystal Palace leh Nottingham Forest academy-te nen an inkhel.
Kum 2020 khan Manchester United, Chelsea leh Southampton academy-te pawh an lo inlan tawh a ni.