Sawrkar laipuia minister of state for External Affairs & Culture Meenakshi Lekhi chuan zanhnih riak turin Thawhtanni khan Aizawl a thleng. Lengpui Airport-ah Art & Culture minister R Lalzirliana leh sawrkar official dangten an lo hmuak a ni.
Raj Bhavan-ah larsap Dr Hari Babu Kambhampati a hmu a. Ministry of External Affairs hmalakna huanga Mizoram tana thil pawimawhte an sawidun.
Mizoram a rawn tlawh chhan leh a hun hman dan turte larsap a sawipui a. Ministry of External Affairs khawih hmalakna pawimawh tak tak, Mizoram tana pawimawh turte sawiin KMMTTP, Zokhawthar leh Vangchhia chungchangte an sawi a. Mizoram chu khawchhak lama India kawtchhuah a la nih thuai dawn avangin ngaihpawimawh a ni a, hmasawnna ruhrel tam pawimawh tur te pawh la siam belh a ngai dawn nia a hriat thu Meenakshi Lekhi hian a sawi a ni.
Chief minister a kawmnaah Mizoram a lo tlawh avangin lawmthu a hrilh a. Mizoram chu international border-in a hual vel ram a nih angin rambung pawimawh tak a nih thu leh hmasawnna hnathawh kawngah remna leh muanna awm a tul thu te an sawi a ni.
Union MoS hian Zarkawt McDonald Hill-a State Museum a tlawh a; museum curator PC Zosangpuii bakah official Ä‘angten an lo dawngsawng. Mizo hnam rohlu, pipute sulhnu leh kutchhuak hrang hrang a enkual a, tha taka enkawl a ni chu fakawm a tih thu a sawi.
Nizan khan Art & Culture minister-in a puala a buatsaih Cultural Programme State Guest House Chaltlangah hun a hmang a. Vawiin hian Mamit a tlawh anga, tlaiah Aizawlah a let leh ang.
Mizoramah Union MoS lokal
Get real time updates directly on you device, subscribe now.