Mizoramah Yoga Day hmang
Khawvel hmun dang rualin June 21 zing khan Mizoram hmun hrang hrangah 12th International Day of Yoga hman a ni a. Aizawlah chuan 34 Assam Rifles hmun Zokhawsangah hmangin, larsap Gen. Vijay Kumar Singh (Retd) leh Health & Family Welfare minister Lalrinpuii ten an hmanpui.
Larsap chuan yoga chu thlan tih tlakna atana ruahman niloin, taksa leh rilru lam inrem taka siamtu a ni zawk a. Hun tam aiin tih dan phung dik a mamawh zawk tih sawiin, “Taksa tih chet vak lam a kawk loa, boruak hip luh leh thawk chhuah mil zela chet lak a pawimawh a, tih dan hrang hrang hi natna bik ti dam thei tura duan a ni,” a ti.
Exercise awlsam leh hmanraw mamawh tlem a nih avanga mitin banphak a ni a, hmunhma a mamawh tam loh avangin khawi hmunah pawh tih a remchang tih a sawi.
Prime minister Narendra Modi hmalaknain Yoga chu khawvel pum hriat hlawh leh ngaihven a ni a, International Day of Yoga-in khawvel puma hman theih tura UNO-in a pawmpui atanga kum 12-na hmel a hmu ta chu lawmawm a tih thu a sawi. Yoga exercise chuan taksa leh rilru hriselna atan tinzawn leh hnathawh dan bik an nei hrang theuh a, tangkai taka hman a nih theihnan tih dan dik – ‘common yoga protocol’ zawm a tul tih la sawi bawk.
Health minister pawhin, khawvel hmun dang ruala Mizoramin khawvel pum huap hriselna lam hawi hmalakna lian leh pawimawh International Day of Yoga puala hun hman a ni chu lawmawm a tih thu a sawi a. Yoga chuan nitin khawsak buai leh hah tak karah mihring muanna leh rilru fim a pe tih a sawi.
International Yoga Day 2026 lawmnaah hian 34 Assam Rifles commandant Col Laldinpuia chuan National AYUSH Mission Yoga Crew kaihhruaiin yoga tih dan tur dik “Common Yoga Protocol” tarlan angin, yoga exercise chi hrang hrang hmangin taksa leh rilru sawizawina a kaihruai a. India ram puma International Day of Yoga 2026 lawmna pui ber, Red Road Kolkata-a hman chu inbiak hmuh theihna kaltlanga chhim niin, Prime minister thusawi ngaihthlak a ni.
International Day of Yoga pual hian Mizoram hmun hrang hrang – District Hospital, Health & Welness Centre, zirna in leh pawl hrang hrangin an remchan dan ang zelin hun an hmang a. Kumin thupui atan “Yoga for Healthy Ageing” tih hman niin, a tum ber chu rilru leh taksa hrisel tak nen upat hun hmang thei tura yoga chhawr tangkai a ni.
National AYUSH Mission Directorate of AYUSH thawktute, 34 Assam Rifles, Mizo Air Sqn. NCC leh sawm bik dangte an tel a ni.