Mizoramin khawvel huap inelna lian thleng dawn! Mizoramin khawvel huap inelna lian thleng dawn!

Sports minister-in banelh chak rual lawmpui
Mizoramin khawvel huap inelna lian thleng dawn!
Nimin khan sports minister leh Mizoram State Sports Council president ni bawk Lalnghinglova Hmar chuan a office chamber-ah tunhnai maia khelh zawh tak Asian Arm Wrestling International Cup-a India ram tana medal latute Denic Lalhruaitluanga (gold medalist – 80 kg senior men right hand), Benjamin Lalawmpuia (silver medalist – 100 kg senior right hand man) leh Vanramnghaki (bronze medalist – (80 kg women left & right)-te lawmpuina hun a buatsaih.
He huna thu a sawiah sport minister chuan Asian Arm Wrestling International Cup-a medalist-te chu Mizoram sawrkarin a lawmpui takzet thu leh sawrkarin dan anga a tih theih ang angte medalist-te tan tih zel a tum thu a sawiin, Asian Arm Wrestling International Cup-a medalist-te hlawhtlinna hian Mizorama Arm Wrestling khawvel a tihdanglam a rin thu leh he game hian hlut a la hlawh chhoh zel tur thu a sawi bakah kumin December thla hian Aizawlah International Arm Wrestling Event lian Pro Panja Mega Match buatsaih a nih tur thu a puang.
Lalnghinglova Hmar chuan, “Mizorama recognised state level sports association 33 zinga sports association engemawzatin incentive cash award an dawng ve thei lo a, hei hi a chhan chu Olympic discipline an nih loh vang a ni a, mahse, Olympic game bik a awm tak tak thei lo a, tuna Olympic discipline-a tel mekte pawh hi an tel loh hun a awm a, a tel lote an tel ve hun a awm zel bawk a, Olympic game nghet a awm thei tawh lo.
“Chuvangin, ZPM sawrkar chuan Mizorama state level sports association zawng zawngte hnena inthlan hmaa kan intiam angin incentive cash award kan pe vek tawh dawn a, chutiang zelin Asian Arm Wrestling Cup-a India tana medal latu Mizo infiammite pawhin an dawng dawn. Tun hmaa incentive cash award dawng thei lo game dangte pawhin an dawng vek tawh dawn a ni.
“Mizoram Arm Wrestling Association leh People’s Arm Wrestling Federation of India (PAFI)-te nen nizana kan ina meeting kan neihnaah International Arm Wrestling Event lian Mzorama buatsaih chungchang kan rel angin, kumin December thla hian Pro Panja Mega Match Mizoramah kan buatsaih dawn a; kan infiammite hmakhua hi sawrkar chuan a ngaihtuah zel dawn a, an hlawhtlinnain a phu ang zelin incentive cash award leh sawrkar hna nghet thlengin kan ngaihtuah zel dawn a ni,” a ti.
He hunah hian Mizoram Arm Wrestling Association hruaitute’n medalist-te hi tawiawmin, association hmalakna report ngaihthlak a ni a; People’s Arm-Wrestling Federation founder leh president-te’n he hun hi an hmanpui a, thu sawina hun an hman bakah ZPM general headquarters hruaitu thenkhatte’n minister hi an tawiawm a, medalist-te hnen atanga thusawi ngaihthlak a nih bakah media mi thahnem tak an tel bawk.