Mizoramin Kristiante hun pawimawh ngai pawimawh thin

Election Commission of India (ECI) duh dan
chuan Chawlhni kha vote chhiar ni tur a ni a, mahse Mizoram kohhrante leh tlawmngai pawlte, political party-te ngenna avangin a tuk atan an sawn.
2021-a Serchhip biala by-election neih a nih khan April ni 17-a vote thlak tur, May ni 2-a vote chhiar tur tiin ECI-in a lo ruat tawh a, khami tum khan vote thlak ni leh a chhiar ni sawn turin MKHC-in a lo ngen tawh. Vote thlak ni hi Inrinni a ni a, a chhiar ni hi Chawlhni a ni. Khami tum kha chuan ngen hlawhtlin a ni ta lo a, tun tumah erawh ngen hlawhtlin a ni.
Mizoramah Chawlhni-a sorkar thiltih hi a theih tak tak loh a, kumin October ni 1 pawh khan India ram pum faina hnatlang neih tura tih ni mah se Chawlhni a nih avangin Mizoram chuan a lo zawm ve lo tawh. Chawlhni-ah state dang an hnatlang a, Mizoramah chuan a tukah an hnatlang.
Faina hnatlang neih dawn hian Mizoram Kohhran Hruaitute Committee (MKHC) chuan chief minister hmuin ni danga hnatlan an rawt a, chief minister-in a lo pawmpui a ni.
Serchhip by election-ah Kristiante ni serhah hun hman a ni a, tum dangah chuan Kristiante ni serhah sorkar thiltih a awm lo tia sawi theih a ni ang.
India sorkarin 2014 atang khan December ni 25 chu Good Governance Day atan a puang a, Mizoramah chuan December ni 25-ah hian hun hman a ni ngai lo.
Mizoram sorkar chuan Krismas lai vela Mizoram tlawha zin lo turin mi pawimawhte leh rorelna fawng chelhtute a lo ngen tawh thin a, Krismas lai hi chuan sorkar mi pawimawhte pawhin Mizoram an tlawh ngai lo.