Mizoramin Sial leh Lawi ngah lo

Pi leh pute a\anga Mizote ranvulh pawimawh, sial a tam ta lo a, naupangah phei chuan sial la hmu miah lo a awm theih tawh viau ang. Lawi pawh a tam lo a, sial aiin a tlem.Mizoram Economic Survey bu thar bera ran chhiarpuia (20th Livestock Census) ran awm zat tarlan a ni a, ranvulh chi hrang hrangah lawi a tlem ber a, sialin a dawt.
20th Livestock Census-a a lan danin, Mizoramah sial hi 3957 a awm mek a, district pali- Hnahthial, Mamit, Aizawl leh Lunglei district-ahte chuan sial hi a awm lo.
Champhai district-ah a tam ber a, sial hi 2225 an nei. Siaha district-in 1072 an nei a, heng district pahnihte hian an thawhhlawk avangin sial hi Mizoramah sang a la tling tiin a sawi theih. District dangah chuan tlem azawng a awm ve a ni chauh.
Ran tlem ber lawi hi Lunglei district-in an nei lo a, district dang zawngah chuan a awm. Mahse khawi district mahin an ngah lo.
Lawi tam berna Kolasib district-ah 530 a awm a, Champhai district-ah 493, Siaha district-ah 397 a awm. District dangah chuan tlem te te a awm.

Sial leh Lawi awm zat

District Sial Lawi
Saitual 350 271
Khawzawl 55 87
Hnahthial – 25
Mamit – 11
Kolasib 29 530
Aizawl – 2
Champhai 2225 493
Serchhip 222 167
Lunglei – –
Lawngtlai 4 127
Siaha 1072 397