Mizoramin tomato ngah telh telh

Tun hnai kum li chhungin Mizoramin tomato a ngah telh telh a, kum li chhung tomato thar chhuah zat a pung.
Budget Session neih zawh takah khan agriculture minister PC Vanlalruata’n tomato thar chhuah zat hi House a hrilh a, kum li chhung a pung tawh tih a lang.
Zawhna leh chhanna, ziaka chhan chi, Hachhek bialtu Robert Romawia Royte zawhna chhangin agriculture minister hian tomato thar chhuah zat hi House a hrilh a. kum kal mek 2023-24-ah hian metric ton 27,130 thar beisei a nih thu a sawi.
Minister chhannaa a lan danin, 2019-20 khan metric ton 21,325 thar a ni a, 2020-21 khan metric ton 25,100, 2021-22 khan metric ton 26,028, 2022-23 khan metric ton 27,130 thar a ni.
Kum kal laia thar chhuah zat hriat theih a la ni lo a, metric ton 27,130 chu thar chhuah zat tura rin zat a ni.
Tomato hi Mizoramin a ngah telh telh a, kuthnathawktute’n an uar telh telh. Covid-19 vanga hrilen lai, 2020 velah khan Mizoram a intodelh tan nia ngaih a ni nghe nghe.
Hriat theih chinah Mizorama tomato thar chi chi nga vel a awm a, chi thenkhat tam tham lova thar pawh a awm.
Tomato hi thla thum velah a thar a, a rah hun vanglai bakah ‘off season’-ah pawh tam tham tak a rah thin bawk.
Phai atanga lakluh a la awm tho a, mahni duhthua lakluh theih, mimal sumdawnna a ni. 2020 leh 2021 velah khan phai atanga lakluh hi awm lo ta se, Mizoram ei khawp chu ram chhungah thar chhuah a ni tawh tho ang tiin an lo chhut tawh a ni.