Mizotaxi-a inziaklut la tam lo

hla a liam tawh a, mahse Mizotaxi app hmang tura inziaklut an la tlem; taxi pute’n he app hi hman an la tum hmel loh khawp mai.
State Transport Authority-in an chhinchhiah danin, Mizotaxi app hmang turin taxi-pu 1549 an inziaklut tawh.
Two wheeler 1134 an inziaklut tawh a, four wheeler taxi 391 leh autorickshaw 24 an inziaklut tawh. Mipui lamah he app hmang turin mi 23508-in an install tawh bawk.
He app hman tum taxi 130 chuang chu hnawl a ni tawh a, lirthei document fel lo leh a khalhtu document fel loh vang te a ni tih thu dawn a ni.
Mizotaxi app hi July ni 1 atanga Aizawl khawpuia hman tura tih a ni a, State Transport Authority hmalakna a ni.
Hman tur tih a nih tirh atangin taxi-pute’n an duh lo a, thuneitu lam nena indawr reng chungin, a duhin hmang se tih a ni ta a ni.
Taxi-pu tam zawk chuan tun thlengin he app hi an duh lo a, hman tum lo an la ni fur.
Taxi-pute titi-ah chuan, he app hmang tura registration ti tura Rs 500 chawi a ngai hi an duh lohna chhan lian pakhat a ni a, hei hi mak pawh an ti. A tirah chuan Rs 600 a ni a, thuneitute nena an inbiak hnuah Rs 500-ah tihhniam a ni.
Hetiang app hi Mizoramah a hman theih tak tak loh tih an sawi a, two wheeler taxi-te’n huiva app an lo hman tawh thu leh, hman chi a ni lo tih an lo hmuh tawh thu te an sawi.
Taxi-pute chuan mipui lamah pawh app hmang lo tura duhtu an tam tih an sawi a, an passenger-te’n hmang lo tura an ngen fo thu te, an hman ve thiam dawn loh avanga app duh lo an tawn thin thu te an sawi.