Peace Accord zar zoa Peace City siamna diltu in a sawichhe leh si – Zodintluanga

Peace Accord zawm that zar zoa Thenzawla din tur Peace City siamna atana sum dilchhuaktu Pu Lalduhoma chuan Peace Accord ber a sawi chhe leh si niin Congress hruaitu Zodintluanga chuan a sawi a. Tawngkam na tak taka midang chungchang a sawi thin chu ama chungah a thleng let mek niin a sawi bawk.
Zirtawpnia Congress Bhavan-a inkhawmah MPCC vice president Zodintluanga chuan, ‘Mizo Accord’ a nihnaa special provision chu Mizoram thu loa khawih danglam theih loa ngaih a ni a, India ram chhung khawiah pawh tlang par par thei tura inngaiten he dan hi ngaithei lo an awm tawh laiin, ‘hlih an tum chuan a tawp thlengin kan humhim ang,’ ti pawh ni lo, CM berin an duh hun hunah an hlip thei, a ti ngawt mai chu hlip se a tih vang nge, tiin a zawt.
“Chhungkaw chungchang, nupa chungchang leh unaute chungchang thil dik leh thleng theiah pawh sawi tullo a awm thin. Peace Accord pawh Pu Laldenga nen zan rei tak thleng duangin kan ziak, a ti a. A hnuah Mizo mipui a huam lo, a ti leh a. Modi a zuk hmu a, Peace Accord zawm thatna (lasting symbol of Peace Accord) zar zoin Thenzawla din tur Peace City siamna atan cheng vaibelchhe 10 min pe a ti a, Peace Accord ber a sawi chhe leh hi eng vang nge? Kan sakhua, missionary hnathawhte humhim a ngai tih hi hria se ka duh,” a ti.
Mizo pipute khan mi dawihzep, thian chhan ngam lo chu pawnfen feng tlak, an ti thin tih sawiin, chief minister-in kan inhumhimna ILP central-in min hlihsak an tum pawha kan dodal ang, ti loa, an duh chuan min hlihsak thei, a tih duh lohna lantirna atan Congress Thalai-in dawihzep tiin puanfen an fentir a, kha thil an dodal chungchangah khan MHIP khan an tih loh tur an ti a, Congress Thalai thiltih kha political party pakhat tlawnin khatiang kha ti tawhlo turin a ngen tih Zodintluanga hian a sawi.
ZPM chu sawrkar kal tawhte a chhe thei ang bera nasa taka dawta an beih hnu ah, sawrkarna an siam veleh sawrkar lai beih chu ramhlui zia, tiin, party policy sawi turin opposition party-te an phut let a, hemi thangah chuan mi tam tak an awk a, sawrkar lai an beih anga an beih ve an hlauh vang a ni tih a sawi. ZPM thanga awk loin, Congress chuan nasa takin opposition role an play dawn tih a sawi a ni.
NLUP chu a that em avangin party dangin a ngaihna an hre ve si loa, sawiselah an tlak niin MPCC hruaitu hian a sawi. “Kan ram kum 20 a buai a, kan harsa em em a, kan rahbi a tleu a, mipui an rethei em em a ni. Pu Lal Thanhawla ten NLUP an rawn duang chhuak a, mi tam tak eizawnna an siamsak a, tam takin an dinchhuah pui avangin Pu Lal Thanhawla khan ‘Pathian lamtang programme’ a ti hial a ni,” a ti.
Hun kal tawhah khan Congress sawrkarin thil tih dik tawk loh an nei a nih pawhin, an thil tih that, an hnathawh tawh leh ram tana an la thawh lehzel tur ensak turin Gen Z leh thalai hna zawng mekte a chah tih a sawi a. Sawrkar kal tawh zingah Congress-in ram tan, kuthnathawktute tan, mirethei zawk, eizawnna bul tan ngaite tan a lo thawk tawh thin a. Thingtlang leh khawpui lamah Congress a sawrkar leh theihnan tang thar turin mipui a ngen tih a sawi a ni.