Mizotaxi app kaihhnawiha sawrkar an ngenna in awmzia la nei thei lo

Taxi leh auto rickshaw tana sawrkarin fare/ rate a siamsak leh a kaihhnawiha heng hmanga eizawngten sawrkar an ngenna chu tihhlawhtlin a la ni loa, awmzia a neih loh chuan hma lak zui zel an tum tih an sawi.
Mizoram Taxi Association (MTA), Aizawl Two Wheeler Taxi Association (ATTA) leh Aizawl District Auto Rickshaw Owners Association (ADAROA) thuchhuak chuan, Mizotaxi mobile application hmang tura State Transport Authority-in a tih chungchangah, online booking system that tawk lohna lai nia an hriat sawrkara an thlen, a hlawhtlinna hmuh tur tun thlenga a la awm lo chu hriatthiam har an tih thu an sawi.
‘Tunlai ei leh bar, khawsak sang zel leh oil man to chho zel nen, STA-in March 2024 daih tawha rate min siamsak hman tir min la tum hi hman chi ah kan ngai lo,’ an ti.
Taxi/auto hmangtu leh taxi/auto khalhtute tan pawha chhiat tawn loh na tura an ngaih, rate awm tawk sawrkara ziaka an thehluh chu sawrkarin pawm sak thei se an duh tih an sawi a ni.
Mizotaxi app-a inziahluhna man Rs.500 an chawi ngai leh taxi/auto hmangtu mipuiin taxi/auto an hman apianga chhiah 6%- 10% an chawi zel a ngai tur chu tha an ti lo tih sawi nawnin, driver/ rider zawng zawng sawrkarin chhiah taxi/auto fare atanga lak turah collector-a hman a tum chu an duh loa, taxi/auto fare kaltlanga mipuia chhiah a lak tur chu eng dan hmanga lak nge tih an hrethiam lo tih an sawi bawk.
Sawrkara an rawtna thlen hian awmzia a nei lo zel a nih chuan, pawl pathum hian a tawp thlenga hma lak an tum tih an sawi a ni.