By SP-a, Bawngkawn
-- Advertisement --
Tun hnaiah State sawrkar hnuaia hna thawk tur laknaah hnam dang mizo ni lo lak an nih avangin lungawi lohna thawm kan hre ta fo mai a. Kan state chhungah hna a tlem a, hna tlemte ruak hnawh khat turin diltu tam tak tak kan awm ta zel a. Private hnuaiah hlawh tha taka thawhna tur kan ram chhungah hian a la awm tam lo a. Chutih laiin sawrkarah chuan hna hniam ber thawktu pawhin hamthatna tam tak: hlawh bakah dam loh nikhuaa medical reimbursement tih theihna dan leh ni engemaw zat chawlh theihna dan thlengin hamthatna an dawng a.Chumi a nih avang chuan mizo te hian sawrkar hna lo chu hna thawh tlak tak takah kan ngai thin lo a, hna laknaa hnam dang loin zep ve zeuh hi kan ngai thei lo hle a ni.
Sawrkar hnuaiah hian hna reng reng mumal taka lak a nih theihna turin Recruitment Rules emaw Service Rules emaw, Examination Regulation emaw Guidelines emaw siam thlap a ni thin. Recruitment Rules-ah chuan hna diltuin zirna lama thiamna a neih tur chin tarlan a ni thin, entirnan: Group D hna diltu chuan class 8 a pass a ngai a; LDC hna diltu chuan HSSLC a pass a ngai a, chutiang zelin. Heng bakah hian Mizoram sawrkar hnuaia hna diltu reng reng chuan sawrkarin a pawm pui computer certificate a neih ngei ngei a ngai a. “Mizo tawng middle school standard thleng tal a thiam tur a ni”, tih te a awm zel tawh bawk. Group D leh Driver hna diltu tan chuan computer certificate hi phut a ni ve lo. A hna a zir zelin thiamna ngai leh certificate ngai hi chu a dang lam zel thin.Heng te hi tu tan pawh DP&AR website atanga hmuh theih vek an ni.
A chunga tarlan ang hian Mizoram sawrkar hnuaia Recruitment Rules siam reng rengah hna diltuin middle school standard thleng tal mizo tawng a thiam tur a ni tih a ni zel a. Mizo zingah middle school thleng pha chin chuan nal takin mizo tawng kan ziakin kan chhiar thei tlangpui vek thin. Kan ziah dan a ngaihnawm leh ngaihnawm loh chu thudang ni se.Ka sawi duh zawk lai tak chu “Hnam dang hna diltuin mizo tawng a thiam leh thiam loh hi eng tiangin nge kan hriat theih ang? India khua leh tui a nih chuan hna dil lo tura hnar ngawt theih a ni bik si lo va”, tih chungchang hi a ni. Written exam sap tawnga buatsaih a ni a, Interview pawh a tlangpuiin sap tawnga neih thin a ni bawk a (Group D leh Group C hna thenkhatah erawh Mizo tawnga neih thin a ni.). Hna diltu hian mizo tawng hi a thiam tak tak nge tak tak lo tih hriat hi a har dawn hle a ni. Personal Interview-ah hian personal interview mark atana dah hran atangin endiktute hian 80% aia sang lo leh 40% aia hniam lo mark an pek a ngai ngei ngei. Chu kaihhruaina dan awmsa chu endiktu ten an zawm thin.
Interview mark hi written mark atanga chhuta 12.5% a ni thin. Chuta tang pawh chuan duh zah zah mark inpek ngawt theih a ni chuang lo. Chhang dik vekin interview mark atana dah hran mark atanga 80% aia sang a hmu thei lo a, zawhna chhang dik lo vek pawhin 40% aia hniam mark a hmu thei bik chuang lo, interview tura a rawn inlan ve miau si chuan. “Hepa hi hnam dang a ni si a, mizote hmakhua ngaiin, a chhan theih miah loh turin mizo tawng vekin emaw, a thiam miah loh tur chiang sa vek zawhna emaw ka’n siamsak teh ang” tih pawh tum se, Interview board member te khan 40% aia hniam interview mark an pek a thiang chuang lo. Sawrkarin kaihhruaina dan a siam sa vek a, chu chu an zawm ngei ngei a ngai tlat. Written exam mark leh Interview mark tang kawp chung pawha, hnam dang pain mark a la hmuh san viau tho bawk si chuan chu hnamdang pa chu hnawl ngawt theih a ni lo.
Recruitment Rules (RR) emaw Service Rules (SR) emaw siamtu leh hna lak dan inkaihhruaina dan duangtu leh siamtu hi MPSC emaw MSSSB emaw an ni lo a, sawrkar hnuaia DP&AR (GSW) te zawk hi an ni tih hi kan hriat tlan a ngai. MPSC leh MSSSB te hi chu sawrkar-in RR/SR a siam leh guidelines a siam zawm chunga hna lak buaipuitute chauh an ni. Heng board te hian written exam leh personal interview an neih fel hnuah hnalak tura an rawt chhuah te hming an tar chhuak a, chung hming te chu sawrkarah an thawn leh thin a ni.
Hnam dang Mizoram sawrkar hnuaia hna rawn dil ve te kan dan theihna tur hian enge maw tala hma kan lak chu a ngai. Amaherawhchu hemi atana hma la theitu tur hi MPSC emaw MSSSB emawte hi an niin a lang lo. Hnalak dan leh kaihhruaina dan siam thei tu sawrkar, DP&AR (GSW) ngei hi hma la theitu tur chu niin a lang. Rawtna han siam ve ila:
Hnam dang kan dan theihna tur hian hnam dangte aia written mark kan hmuh san zawk theihna tur hian exam-a inkaihhruaina thar tichhuakin, compulsory subject atan Mizo tawnga chhan tur, middle school standard chinin an chhan theih tur mark 100 pu telh belh ila. Sylabus tur te duang ila. RR a piangah “hna diltu chu mizo tawng thiam an ni tur a ni” tih a ni sa zel tawh tho bawk a, thil siam that harsa tak tur chu a nih a rinawm loh. An tih tura ruat dik taka titu Board member te leh Chairman te dem ngai tawh lovin Mark100 hi chuan min chhan thei em ang chu. Hma lak vat a ngai e.