Mizoten aiawhtu huaisen kan neih a pawimawh hle – MNF treasurer

India ram inrelbawlna insingsa mek karah Mizoten aiawhtu huaisen leh rintlak kan neih chhunzawm chu kan ram leh hnam tan thil pawimawh em em a ni tih MNF treasurer Lalruatkima chuan a sawi.
Thawhlehnia Aizawl Municipal huamchhunga MNF local council member-te an inhmukhawm a, Aizawl khawpui enkawl kawnga AMC hnuaia local council-ten hna an thawh dan hrang hrang an thlir hoa, Lok Sabha MP inthlan tur an thlirho bawk.
MP Election Campaign directorate vice chairman ni bawk Lalruatkima chuan Aizawla local council tinte mipui tana an inpekna leh vengtin hmasawnna atana an hnathawh fakawm a tih thu a sawi a. Hun harsa leh khirhkhan kara mipui aiawh zo taka hruaitu hna an thawh chu mipui tan malsawmna a ni tih a sawi.
“Veng tinin hmasawnna tha leh mipui thlamuanna kan mamawhin kan duh theuh a, chutiang a thlenna tura MNF sawrkar lai leh ZPM sawrkar tak hnu hi thil inthlak duai lo se ka duh a. Mipui mamawh hnianghnar chhunzawm zel se ka duh a ni,” a ti.
MP inthlan turah kan ram, kan hnam leh kan sakhaw himna dah pawimawh a tul tih sawiin, K Vanlalvena’n chakna a chan ngei theihna’n Aizawl Munipal huamchhunga local council member tinte chu theihtawp chhuah turin a sawm tih a sawi a ni.

Kalkhawmte resolution pass –
# AMC huamchhunga veng hrang hrangin MNF ministry hnuaiah nitin mamawh – gas, tui, buhfai adt. hnianghnar taka kan hmu thin kha lawmawm kan tiin, ZPM sawrkar hnuaiah Aizawl Khawpuiin hun hmasa lama tui hnianghnar leh gas/buhfai supply kan dawn thin ang dawn leh kan inbeisei a, fur leh thal thleng turah ruahmanna fel tak nei lawk turin kan beisei a ni.
# MP inthlanah Zoram mipui candidate Pu K Vanlalvena, mi huaisen leh hrat khawkheng, hnam pasaltha kan nei hi a lawmawm kan tiin, kan chhuang takzet a. MP (RS) a nih chhunga a hnathawh leh a chetdan enin MP nihna tihlutu a ni a, thlantlin chakawm tak leh rintlak a ni, kan ti.
# Mizoram mipui aiawha Parliament House-a thu tur hian Pu K Vanlalvena hi kan ringtawk a, hnamdang kara zam hauh loa, a Mizo nihna leh Kristian nihna a lantir ngamte, Mizoram mai nilo, kan thenawm ramdang leh state danga awmte harsatna a taka hre chunga an thlavang huaisen taka a hauh ngamte hi fakawm kan ti a. A huna huaisen ngam MP neih chhunzawm zel hi kan duh a ni.
# State thenawm (Assam) nena ramri buaina kan tawh chungchanga huaisen taka a auchhuak ngam kha ropui kan tiin kan chhuang a, Assam sawrkarin man tuma a police uisathiam nen an um rap rap na kara zam hauh loa a hmachhawn ngam kha chhuanawm kan tiin, Mizoram tana pasaltha nihna a nunpui ngamah kan ngai a, nunpui chhunzawm zel tur leh Zoram tana thawk zel turin kan duhsak a ni.
# Sakhaw tlem zawk leh hnam tenau zawk kan nih avanga India ram chhunga nekchep kan nih mekna kara huai taka ding ngam tur MP kan neih chhunzawm ngei kan duh a ni.