MJA-in member thar lalut

Mizoram Journalists’ Association-in member pasarih a lak thar zinga general headquarters hnuai ami member panga chu Thawhtanni khan Aizawl Press Club-ah lakluh an ni.
Member tharte lawmluttu MJA president C Lalrambuatsaiha chuan, thuthar thehdarh kawngah journalist-ten tan lak thar zel a tul tih a sawi a. Social media platform hrang hrang hmangtu an pung zel a, hei hian thuthar thehdarhtute a run nasa a, a bikin chanchinbu lama thawktute chu social media-in a eiral mai loh nan insang mar a, tun aia chak lehzuala ke pen a tul tih a sawi.
Pawl reng reng chak taka kal tur chuan inlungruala thawh hona tha neih a tul tih sawiin, MJA member-te chu pawl hmalakna ngaipawimawh a, thil tihna zawng zawngah an tel vek hman lo a nih pawhin a tam thei ang ber MJA hmalakna tawiawm turin a sawm a ni.
Hemi hnu hian MJA vice president C Lalhmachhuana kaihhruaiin general body meeting neih zui a ni a. Member-ten tan lak a ngaihna nia an hriat sawiin, pawl inrelbawlna lama hriat tur tulte inhrilh a ni.