MKHC-in inhmuhkhawm huaihawt Vote chhiar ni sawn lo

Mizoram inthlanpui vote chhiar ni tur, December ni
3 hi Chawlhni a ni a, Mizoram Kohhran Hruaitute Committee (MKHC) leh pawl hrang hrangin a hun hi sawn turin an ngen. Mahse a hun sawn tumna a la awm loh avangin MKHC-in inhmuhkhawm an rawt.
Thawhtanni zan khan MKHC an thu a, November ni 2 zana kokim zawka inhmuhkhawm an rawt. He hunah hian political party hrang hrang, MPF leh NGO Coordination Committee aiawhte an sawm a, kal zel dan tur hi rel an tum a ni.
Vote chhiar ni sawn tur hian MKHC hian Election Commission of India (ECI) hnenah ziaka ngenna an lo thehlut tawh a, Mizoram Synod, MPF leh party hrang hrangin an thehlut tawh bawk. Mahse ECI hian tun thlengin an la chhang lo.
“Ngenna kan thehlut tawh a, MKHC chauh ni lovin Mizoram Synod, MPF leh party hrang hrangin an thlen tawh a. Beiseina sang tak nen kan thlir a, mahse a reh ta vang vang mai si a, kal zel dan tur ngaihtuah a ngai e kan ti a ni,” tiin MKHC chairman Rev Dr C Chawnghmingliana’n The Aizawl Post a hrilh.
An kal zel dan turah duan lawk a awm loh thu a sawi a, inhmuhkhawmnaa sawi chawp tur a nih thu a sawi.
MKHC-in vote chhiar hun sawn tura ngen ni se tia an rel lai khan, hlawhtling lo se engtin nge ni ang tih pawh an ngaihtuah thu a sawi a, ‘A hlawhtling turah ngai ila, beisei phawt ila. A tul tak leh hmalak zel dan tur chu ngaihtuah chawp ni se’ tia thu an dah sa thu a sawi.
“Mipui kan tanrual a ngai a, kan vaia kan tan a ngai a. Chuvangin kokim zawka inhmuhkhawm hi a ngai kan ti,” a ti a, inhmuhkhawmnaa tel tura an sawmte pawh an lungrual a, thahnem an ngai tih a sawi.