MKHC-in vote chhiar ni chungchangah ECI nghak

Mizoram inthlan vote chhiar hun sawn tura ngentu Mizoranm Kohhran Hruaitute Committee (MKHC) chuan ECI hnenah lehkha an thehlut leh a, darkar 24 an nghah tur thu an hrilh.MKHC hian Zirtawpni chhun dar 1-ah khan Mizoram election department CEO kaltlanglin ECI hnenah lehkha an thehlut a, vote chhiar hun sawn tura ngenin, darkar 24 an nghah tur thu an sawi.
ECI chuan vote chhiar ni atan December ni 3 a ruat a, hei hi Chawlhni a nih avangin MKHC chuan sawn turin ECI hi an ngen a ni. October ni 11-ah khan ECI hnenah hian lehkha an thehlut a, Mizoram Synod, MPF leh party hrang hrangin an thlen tawh bawk. Mahse ECI an ngawih avangin November ni 2 zanah khan MKHC huaihawtin NGO Coordination Committee leh political party hrang hrang aiawhte an thu a, a tukah ECI-ah lehkha an thehlut leh ta a ni.
MKHC general secretary Rev R Lalrinsanga chuan darkar 24 hi an lehkha thehluh atanga an chhiar tan thu a sawi a, beisei an neih thu leh ECI-in vote chhiar hun a sawn an beisei thu The Aizawl Post a hrilh.
“Kan kal zel dan tur hi sawi theih a awm lo a, sawi lawk a awm lo. A tul anga rel chawp tur a ni ang,” a ti a, an inlungrual thu a sawi bawk.