MLA dan kalh nia hriatte thlen Dan kalhna a awm lo – Speaker

On May 28, 2024 15 0

Mizoram State Legislative Assembly member zinga dan kalha awm nia an hriat te chu People’s Conference party leh Aam Aadmi Party Mizoram chuan siamthat emaw chinfel emaw dan kawng zawng turin Thawhtanni khan speaker hnenah an thlen.
Assembly speaker Lalbiakzama hnena hemi chungchang an thlennaah PC president Vanlalruata chuan, ‘The Rules of Procedure and Conduct of Business in Mizoram Legislative Assembly’ anga Assembly Subject Committee pakhat aia tamah MLA-te member an nih theih loh laiin, MLA 16 chu Committee pakhat aia tamah an tel a; he dan vekin minister-te Committee-a member nih a khap laiin, portfolio nei thlapa minister of state rank leh status nei adviser to CM pali chu Assembly Committee hrang hrangah an tel tih a sawi.
He dan vekin Ethics Committee-a govt. chief whip/ govt. whip tel a khap laiin, deputy govt chief whip chu member a ni tih an thlen bawk.
Assembly Committee hrang hranga minister tlukpui leh MLA te an tel tam chuan, thil dik lo chhuitu tur ber Committee chu a din chhan ang a nih phak loh an hlauh avangin, siamtha turin an ngen tih speaker hnenah hian an thlen a. MLA-te hetianga mawhphurhna tam zawk an pe duh a nih pawhin mawhphurhna tam zawk an chelh theihna dan chu siamtha mai turin an ngen tih an sawi a ni.
Speaker Lalbiakzama chuan AAP leh PC party-in dan bawhchhiatna awm nia an sawiah dan bawhchhiat an nei lo tih a sawi ve thung a. Dan an tlawhchhan ber pakhat, Section 277(2) chu paih (delete) a ni tawh a, Rules Committee (2020- 2021) in First Report an thehluh angin kum 2020 khan thlakthleng a ni tawh tih a sawi.
Minister-te chu Subject Committee-a tel khap a nih laiin, adviser to CM chu a khap loa, dan an rawn sawiah hian ‘minister’ a ti chauh a, a tlukpui/anpui (equivalent) tih sawi a awm lo tih a sawi.
Section 288-ah minister, speaker/ deputy speaker te leh govt chief whip/ govt whip khap an nih laiin, deputy chief whip khapna a awm lo niin a sawi bawk.
“Dan bawhchhiatna awma an rawn sawi hi dan bawhchhiat neiah kan inngai loa, thahnemngaihna avanga endik leh tih that ngai awm nia hria a, rawtna an rawn thlen chu kan lo chhinchhiah anga, ram tana tha zawk leh rorelna atana fel zawk nia kan ngai a nih chuan insiamthaa insiamrem turin kan inhawng reng a ni,” Lalbiakzama hian a ti.