MLA-in larsap hnenahkawng chhe lutuk thlen

MLA-in larsap hnenah
kawng chhe lutuk thlen
Hachhek bialtu MLA Robert Romawia Royte chuan Ningani khan Raj Bhavan-ah Gen. Vijay Kumar Singh (Retd) kawmin Tuidam leh Darlak inkar kawng chhe lutuk, CSR projects, Aizawl FC chungchang leh Mizoram hmasawnna tur project a sawipui.
Hachhek bialtu MLA hian a bial chhunga Darlak leh Tuidam inkar kawng chhe lutuk chu Mizoram PWD hotute leh Ministry of Road Transport & Highways hotute bakah maintenance contractor-te sawipuiin, DO letter pawh a ziak tawh a, chuti chunga ngaihthah a la ni chu amah leh khawthlang mipuiin an hrethiam lo tih a hrilh.
Mizoram leh Tripura inkalpawhna awmchhun, NH44A chungchang vawi tam thuneitute hnena thlen a ni chunga ngaihsak loha a awm rei lutuk chu hriatthiam harsa a tih thu larsap hi a hrilh a ni.
Aizawl FC neitu leh president Robert Romawia hian Aizawl FC-in harsatna a tawh chu larsap hi a hrilh bakah CSR fund tam zawk Mizoram hmasawnna atana hmuh dan tur leh Autonomous District Council huamchhung leh Mamit aspirational district tana ruahmanna siam dan tur an sawi bawk.