Human Resource Development (HRD) Board vice chairman Dr L Thangmawia, MLA chuan Shillong-a North Eastern Indira Gandhi Regional Institute of Health & Medical Sciences (NEIGRIHMS) a tlawh.
NEIGRIHMS director Dr Nalin Mehta kawmin NEIGRIHMS-in Mizo damlo tamtak a lo enkawl tawhna leh damlote tana an thawhrimna avangin lawmthu a hrilh a. NEIGRIHMS-in Mizo damlo an an enkawl tam dan azira Mizoram sawrkar thuneitu sangte hnena ruahmanna thar siam tura thlen a tum thu a hrilh bawk.
NEIGRIHMS director chuan medical superintendent-ah Dr C Daniala a awm bakah Mizo doctor, nurse leh doctor zirlai engemawzat an awm avangin an ni tlawmngaihna zarah harsatna liantham awm loin Mizo damlote enkawl theih zel rih thu a lo hrilh a ni.
Medical superintendent Dr C Daniala hian MLA leh a tawiawmtute hi NEIGRIHMS hmunhma fankual puiin hmalakna kal mekte a hrilhfiah a. Cancer enkawlna tur bik pawh peihfel a nih tawh thu leh hun remchang hmasaah hawn a nih tur thu a sawi a. Operation theatre siamthar 8-te pawh enpuiin damlo admit ten awm man leh chaw a thlawna an dawn dan te, damdawi chi hrang hrang MRP aia tlawma damloten an lei theihna’na NEIGRIHMS thuneitute hmalak dante a hrilhfiah bawk.
MLA hian Mizo doctor, nurse leh doctor zir mekten Mizo tlawmngaihna avanga an hna baka damlote an lo buaipui thinnaah Mizoram sawrkar aiawhin lawmthu a sawi a. An thawhrimna leh inpekna avanga NEIGRIHMS pantu damlote an lawm thin zia a hrilh bawk.
NEIGRIHMS hi kum 1987-a din, AIIMS Delhi leh JIPMER Chandigarh te anga doctor specialist thleng zir theih nana din a ni a. India hmarchhaka hetiang zir theihna hmasa ber niin, sawrkar laipui Ministry of Health & Family Welfare hnuaia India rama din pathumna a ni.
MLA-in NEIGRIHMS hotute kawm
Get real time updates directly on you device, subscribe now.
Prev Post
Next Post