MNF dotuten hnam thuthlung an do – Zoramthanga

MNF dotuten hnam thuthlung an do
– Zoramthanga
MNF dotute chuan an do an hre loa, Pathian ruahman sa hnam thuthlung an do niin MNF president Zoramthanga chuan a sawi.
Thawhtannia MNF office-a inkhawmah Zoramthanga chuan MNF din chhan leh auhla chu ‘Pathian leh kan ram tan’ tih a ni a, hruaitu hmasa leh tuna hruaitute an ral hunah pawh he hnam thuthlung meichher hi a ral dawn lo, tiin a sawi.
Mizote chu China atanga chhuakin, tuna kan awmnaah kan tawp chat a. Pathianin ram min pek hnu ah lal thuthlung – Chanchintha min pe a; chumi hnu ah hnam thuthlung – kan inhung tlatna tur thisenin nationalism min pe tih sawiin, “He thuthlung hi Lalpa’n a champion tir dawn,” a ti.
Vawiina amah leh MNF beitute chuan an do an hre loa, hmana thubuai hluite an thukphum lum leh tih MNF president hian a sawi a. “Zoramthanga hi tichhe vek mah se, hnam thuthlung chu a ral loang. An doa hi Pathian leh kan ram tan, tih thuthlung vuan tlattu a ni. A mihringte hi fel tak kan ni lo, mah se ram leh hnam tana bei tlattu leh thuthlung vuan tlattu kan nihna hi kan felnaa pawm a ni,” a ti.
“MNF an do lo, Zoramthanga an do lo. Pathianin Chanchintha hril hna thawk tura he hnam a buatsaihna thuthlung an do a ni zawk. India sawrkar pawhin an do hneh loh thuthlung meichher hi do hneh chi a ni lo,” tiin a sawi bawk.
Kum 1966-a rambuai kha pumpelh theih ni mah se, Pathianin thisena baptist a duh nia sawiin, hnam thuthlung tihnghehna, Chanchintha hril tura min buatsaihna niin a sawi.