Zobiakvela (Masena)
-- Advertisement --
Mizoram kawngpuite hian furpui vawi khat a tawrh hi chuan a chhe lai siam tur engemawzat a awm ziah thin a. Chumi siam hna chu thal lai, November atanga April thla chhunga siam hman ngei a tul thin. Fur leh ruahtui tlak hun a rei avangin, kawng siamna hun tha a tlem a, kan hun neihchhun tangkai taka hmang turin chet ran a pawimawh.
December ni 15, 2018-a MNF sorkar lo piang khan kawng chhiatzia an lo tlangaupui tawh ang leh, Aizawl khawpui chhunga kawng chhiat vanga sorkar nawr nana ‘Kawng zawh’ hial an lo huaihawt tawh angin, kawng siam hna kha an bawhzui rang hle a.
An han sorkar phat khan 2018 krismas leh kumthar inkar, December ni 27-ah Chief Minister Pu Zoramthanga chuan National Highway 54, Sairang leh Khamrâng kawng phei siamthat dan tur a hmunah a zuk en nghal a. I & PR Minister Pu Lalruatkima bakah, Principal Secretary to CM leh PWD Secretary ni bawk, Pu R. Vanlaltluanga E-in-C PWD, CE (Highways) K. Sawmvela leh Officer dangten an tawiawm a ni.
Ram hruaitu lú ber te’n an ngaih pawimawh leh an vei-chilh tawh chu kâr lovah siamthat hna pawh thawh nghal mai a ni ta a. NHIDCL hnuaia Contractor te thawh lai a ni emaw a dang pawh ni se, Mizoram PWD te chu heng hnathawhte viltu an nihnaah leh kan ram sik leh sa mil ngaihtuahna te, mipui ni tin mamawh phurh luh kawngahte ngaihtuahna sêngin kawng siam hna chu contractor-te kutah an dah mawl tawp ngai lo a. Chumi ti tur chuan thuneitu sâng zawkte an inrawlh a tul hun a awm thin.
Kawngpui siam kawngah leh vei kawngah Chief Minister hmasa, Pu Zoramthanga khan a thawk tha viau tih sawi nawn a tul thin a. A ti tha vek e, tihna phei chu a ni kher chuang lo. A zual-zawpui chu an siam tha tlat a ni. Congress Sorkar kum 10 (2008-2018)-a mipui phunnawina siamtu lian ber chu ‘kawng chhia’ kha a ni a. Khatih lai Chief Minister Pu Hawla khan Helicopter hmanga zin kual a uar vei-râwl nen, chu chuan kawngchhe siam ngaihthaha puhna kha a ti punlun tel bawk a.
Pu Zoramthanga lo lal khan PWD hotute emaw, NHIDCL hotute a koh khawm zinzia leh a vil taimâk zia, amah ngei ke-a kal (by-road) ngatin Silchar lam kawng te, Lunglei road leh Mamit leh Champhai road te motor-a kala a zawh ngat ngat mai te khan rah tha a chhuah tih loh rual a ni lo. Hotute’n an vei miau chuan a hnuaia mite’na chutianga thawh mai loh chu tih theih a nei chuang lo va. Pawisa lama harsatna awm thei enpui te, Congress sorkar 2018-in NEDP sum cheng vaibelchhe 85 (8595.19 lakh) zet an lo hnutchhiah hmang te khan National Highway ni kher lo, Aizawl khawpui leh thingtlang kawng chhe zual lai PWD-in a theih chin chin an siam tha nghal mawlh mawlh a nih kha !
Khawvelin a buaipui Covid-19 vanga inrelbawlna a thuanawp vek lai kum 2020, 2021-ah te MNF sorkar khan kawng siam hna Resurfacing leh thil dang buaipui kha a tawpsan chuan loh avangin kawngpui tha min pe tam a. Assembly house-ah pawh kawngpui tha kan neih avanga lawmthu sawina ‘Private member Resolutuon’ pass hial a ni.
Sorkar dinglai ZPM kaihhruai pawh hian kum kal ta, December ni 8, 2023 atanga sorkarna an kuta an lak chiah khan kawngpui chhe zual siam hna, ‘repair’ ngai zual te thlang chhuakin vil zui chat ni se la, tun ang em ema harsatna hi chu kan pumpelh theih a rinawm a. MNF sorkar ang khan kawng siam hnathawh hi hna tul hmasaa an dah thiam tâwk loh vang mai niin a lang. ‘La sorkar ve ngai lo’ an nih avanga ngaihhnathiamna lantir ngawt pawh chu a dik chuang si lo va! Engkim zir chiang sa, tha bik, fel bikin kan kal dawn, research base-zelin; tia an inzawrhnate kha kan thlan tlin chhan a ni miau va..!
A nihna takah chuan, tuna kan ram hruaitute’n an sawi uar em em, an sawi zin tak ni bawk; MNF sorkar-in sum a hman loh SEDP cheng vaibelchhe 150 te kha eng atan nge an hman tâk..? tih hi zawhna lian tak a ni. Khá, 150 crore kha a hmanna hriat hi mipui chanvo a ni a, mipui pawisa a nih vang zawkin.
A nihna takah chuan, SEDP pawisa 150 crore leh SASCI pawisa cheng vaibelchhe 200 chuang MNF sorkar-in a hman zui theih loh (MCC puan vang) hmang te khan kawng siam that hna hi thawh ni se la, kawngpui metal road-a ruah tui leh oil a luh loh nana vênna/danna ‘sealcoat’ tal tih na-chang te hria ni se, resurfacing pawh hmun eng emawzatah tihna hun an nei bawk a. An kuta thuneihna a awm atangin January to May thla chhung kawng siam hna thawhna ‘working season’ a awm; nimahsela, engmah min chanpui loh avangin hun tha kan vui liam phawt tihna a ni ta ber! Hmuhphiah ang tho khan!
Aizawl khawpui chhung kawng siam nan te hian cheng 20, 30 crore chauh pawh hmang se la, tun ang hi chu kan ni hauh lo vang. Mahse, khang pawisa te kha a hmanna tura duansa-ah hmang chuang si lovin, ‘keini chuan thla thar tirah hlawh kan pe thei,’ tia uanpui nan an hmang ta zâwk ni ngei tur a ni. Chu chuan vawiina kan kawngpui chhe ta lutuk hi min thlenpui ta a ni ber! Sum lah chu pûk ve lo tur ang maia insawi te chuan thla tin an puk sauh sauh bawk si a. A hahdamthlak loh khawp mai..!!
Mi tam tak titi-ah chuan kum khat êm pawh la tling lo han ‘enchhin’ pawh hi, hautak leh rei lutukah an ngai lek lek tawhin a lang. Kum dang han enchhin chhoh zel mai pawh chu, a va’n huphurhawm angreng ve, tia social media lama post siam lah an pung hluai tawh chu a nih hi.
Kan ram kawngpui a chhia a, kan vei a, kan sawi a, mak kan ti em em vek a. Congress Sorkar lai kum 2010 October thla chhoa kawng a chhiat em em lai khan Mizoram Chief Minister, Pu Lal Thanhawla kha khawvel pang lehlam USA-ah an nupain hunpui min lo zuk hman san daih tawh a! Tunhnaiah kan Chief Minister, Pu Lalduhoma pawh a nupui fanaute nen USA-ah bawk hunpui an zu hmang leh a! Hetih lai hian kan kawngpui chhiatzia leh state pawn atanga mipui ni tin mamawh lakluh a khaihlak ta mai te hi chu(h) a inhmeh lo lulai deuh thin. India ram mi lian leh hausate fapa mo neihnaa kal kan hmanhlel ang tal hian Mizoram tlangdung kawng chhiate hi tlawh hmanhlel ve ta ila, chu chuan ko-ri a tu deuh ngeiin a rinawm.
Kawng chhia chu lal leh reithei zawkte pawhin kan tawrh dan a inang reng a, lirtheia kalte chauhin an tuar chuang lo. Chief Minister leh Cabinet Minister rual te’n tunlai thingtlang ‘Lo zawh’-na lama a huhova kal dum dum an uar viau mai hian eng rah tha nge a chhuah ang le?! Nuthlawi rualte nen kut insuiha, “German ral lian tâwnin tir suh ka lungdi…” tih paha an lâm sû zuk zuk mai hian eng hmasawnna nge min thlen ang le?!
Chutiang, ‘Lo zawh’ programme dangte pawh chu an la nei inchherchhuan zut a ni awm a! Kan tangkaipui viauna tur hriatthiam a har hle. Heng thingtlang ‘Lo zawh’ an hmanpuinaah hian kawng chhiatzia te tal hi chu han ‘home work’ tel thei se la, kan ziaawm deuh mahna!
Engpawh ni se, Mizoram chhunga kawng zawng zawng hi NHIDCL enkawl National Highway a ni emaw, Mizoram PWD kawng leh a dang reng reng hi a tawpa mawhphurhna latu chu a ram leh sorkar neitu mawh a ni tih hi hre reng ila. Mi tute emaw mawhpuh kual vel lo hian, mawhphurhna la ngam hruaitu a ni lo’m ni kan mamawh ber kha?!