MNF hruaitu lawkte thukhawm zur zut

MNF hruaitu lawkte thukhawm zur zut
Tun hnaiah MNF party hruaitu lawkte an thukhawm malh malh a, tun karah pawh an la chhunzawm dawn.
Lunglei Municipal Council (LMC) inthlan result hriat hnuah MNF hruaitute hi an thu indawt zut a, LMC inthlana an dinhmun chungchang chu an thu khel ber pakhat a ni tih thu dawn a ni.
Thu dawn danin, chawlhkar liam ta Nilaini khan an party committee sang pathum- PAC, National Core Committee leh Elected Office Bearer te an thu a, Ningani-ah Elected Office Bearer te a hlangin an thu bawk.
Thawhlehni hian PAC, Core Committee, Elected Office Bearer te leh Council of Ministers an thu leh dawn a, a tukah an MLA-te zawng zawng nen an thu leh ang.
“An dinhmun te thlirin an hmalak zel dan tur te an sawiho a, tun hnaiah hetianga thutkhawm hi an nei lo deuh reng a, LMC inthlan hnuah an thukhawm ta a ni,” thudawnna pakhat chuan a ti.
Thu dawn danin, tun hnaia thukhawmte hian SEDP chungchang an sawiho a, LMC inthlana an dinhmun an thlirlet bawk. Sorkar hmalakna hrang hrang leh party hmalakna hrang hrang an thlirho a, kal zel dan tur an ngaihtuah a ni.
MNF hruaitu pakhat chuan hmalak zel dan tur an thlir tih a sawi a, Lunglei-a an chak loh chungchang an thlir tih te, thil dang hrang hrang an ngaihtuah a, ram tana an thawh zel dan tur an thlir tih a sawi.
LMC inthlana an chak loh chungchangah tun hnaiah Lunglei mipuite lung tihawi lohna an nei tih an pawm thu te, Mizoram khawpui lian pahnihna a ni a, Lunglei tihhmasawn zel dan tur ngaihtuah chu sorkar mawhphurhna a nih avangin, Lungleiin hma a sawn dan tur an ngaihtuah tih te a sawi.