Sipaiin thla 26 chhunga chhuah fel duh
Aizawl khawpui hmun lailai lai atanga sipai sawn chhuah chungchangah hmalakna a kal mek a, sipai lam hian an chhuah fel hun chhung atan thla 26 bituk ni se tiin an rawt.
Mizoram sorkar leh Assam Rifles te hian khawpui laili lai atanga sipai sawn chhuah chungchangah inremna ‘Memorandum of Understanding’ (MoU) an ziak dawn a, MoU-a tel tur hi an duang mek tih thu dawn a ni.
Mizoram sorkar lamah hian home department chu a kutkentu an ni a, Assam Rifles lam hian MoU-a tel tura duhte pawh home department-ah hian ziakin an thehlut tawh.
Thu dawn danin, Assam Rifles lam hian zawi zawia chhuah an duh a, MoU ziah (sign) atanga thla 26 chhunga chhuah fel ni se tiin an rawt a, hei hi home department-ah an thlen a ni.
Home department lam hian Assam Rifle thu thlen hi an thlir ve mek a, thla 26 chhung hun inpek ni se tih leh Assam Rifles lam rawtna hrang hrang an thlir mek tih thu dawn a ni. Thla 26 hi pawm a ni dawn em tih hriat a ni lo.
Home department hotute chuan Assam Rifles hi engemaw zat chu an chhuak tawh tih an sawi a, sipai leh police hmuna awm zat leh chhuak zat te hi thuruk a nih avangin, a chhuak tawh zat leh a la awm zat te hi sawi chhuah chi a ni lo tiin The Aizawl Post an hrilh.
Tun hnaiah pawh truck 40 velin Lammual ram atangin Assam Rifles hi an inthiarchhuak tih an sawi a, a hmain zawi zawiin an lo inthiar chhuak tawh tih an sawi bawk.
Assam Rifles chhuah felna tura MoU duan mek hi zawh fel hun tur hriat a ni lo a, chak taka bawhzui zel a ni a, a hma thei anga peih tum a ni, home department lam chuan an ti.
Aizawla awm mek Assam Rifles te hi Lakhimpur Battalion an ni a, Lammual ram leh hmun dangah an awm.
Sipaiin thla 26 chhunga chhuah fel duh
Get real time updates directly on you device, subscribe now.
Prev Post