MNF-in Mizotaxi app sut leh turin sawrkar ngen

Taxi leh auto rickshaw ho tana sawrkarin Mizotaxi online application hman a tum chu sut leh turin MNF chuan an ngen.
MNF Gen. Hqrs. thuchhuak chuan, ZPM sawrkarin mipuiah chhiah chi hrang hrang a tihsan kalzelah taxi leh auto rickshaw-te chu Mizotaxi online application hman luihtir a tum a, hei hi Mizoram Taxi Association (MTA), Aizawl Two Wheeler Taxi Association (ATTA) leh Aizawl District Auto Rickshaw Owners Association (ADAROA) chuan him tawk loa ngaiin, driver-te chu chhiah khawntu (collector) atana hman nih an duh lo tih an sawi thu a sawi.
Heng pawl hian Transport minister pawh dawr tawhin an inbiakna in awmzia a nei thei lo nia sawiin, ‘Registration fee Rs. 500 an chawi theuh dawn bakah taxi/ auto hmangtuten an hman apiangin chhiah (tax) 6% atanga 10% zel an chawi a ngai dawn. Mizotaxi apps hmanga mipuia chhiah lak tur hi eng dan hmanga lak nge tih pawh hriat a ni loa, chuvangin sawrkar hian a thil tih tum hi sut leh turin MNF chuan a ngen a ni,’ ti.
Hei hian ZPM sawrkar mumal loh zia, central BJP sawrkar tlawn reng chunga sum an sawi chhuah theih ve loh avanga mipui tawrhtirnaah MNF chuan a ngai tih a sawi.
He apps hi chhiah a ni lo ti mah se, platform fee atana hman tur pawh ti mah se, passenger leh driver-ten a hmaa sum sen ngaih lohnaah chawi a ngai zel dawn a, hna tul buai tam tak insiam belhna a ni tih a sawi a. He apps buaipuitu company hi sawrkarin ruai lo se, engmah sum sen belhna tur a awm dawn lo tih sawiin, ‘Mizorama taxi khalhtu engemawzat leh passenger engemaw zat gpay khawih lo leh smart phone la nei lo an awm a, hei hi chu tuna kan ram dinhmun ni mekah chuan zawh loh nghawngkawl inbah tirna a ni rihah kan ngai,’ MNF chuan a t.
Mizotaxi apps chu lirthei nei ve lo, a hmangtu mipuiin an hman apianga sawrkara chhiah an pekna tura ruahmanna a nih avangin, sawrkar chu sut leh turin a ngen nawn tih a sawi a. MTA, ATTA leh ADAROA hmalakna chu MNF chuan a tawp thlengin a thlawp dawn a, taxi/auto hmang thin mipui pawhin he dan hi zirchiang a, tuna kan ram dinhmun ni mekah chuan hman chi a la nih loh avangin, lo pawm lo turin an inngen tih a sawi a ni.
‘State dang, phaizawla chengte leh keini tlangram kawng chhengchhe lutuka chengte hi, Delhi CM an intehkhin thin anglo takin patla khata buk chi kan ni lo, tih hi sawrkarna chelh mektute hian lo hre bawk rawh se,’ thuchhuah hian a ti.