MNF leh ZPM sawrkar rintlak lo lutuk hi Congress timawitu – Lal Thanzara

MNF leh ZPM sawrkar rintlak
lo lutuk hi Congress timawitu
– Lal Thanzara
MNF leh ZPM sawrkar rintlak lo lutuk chu Congress party timawitu an ni a. Congress a sawrkar loh apiangin Mizoram-in harsatna leh manganna a tawk thin tih Congress hruaitu Lal Thanzara chuan a sawi.
Thawhlehnia Champhai South Block Congress Committee buatsaihin Champhaiah Special Block Conference hman a ni a. Hmanpuitu MPCC president Lal Thanzara chuan, chief minister adviser Pu TBC Lalvenchhunga’n CM adviser a nihna banna a thehlut a, chief minister-in a pawm loa, chief minister thu chu banna thehluttuin a pawm bik loa, ZPM party chu a tute pawh an inpawm lo kual vel vek tiin a sawi.
MNF leh ZPM sawrkar rintlak lo lutuk chu Congress party timawitu an ni, tiin, “Mizoram-in Congress party a mamawh zia a tichiang. Congress a sawrkar loh apiangin Mizoram-in harsatna leh manganna kan tawk. Eizawnna a harsa a, mipui nun a ralti. Congress party a sawrkar apiangin Mizoram mipuiin malsawmna dawngin an thla a muang a, thlarau hlimna a thleng thin,” a ti.
Congress party chu kum 139 leh ni 338 a ni tawh a. Hemi chhung hian India ram leh Mizoramah party tam tak an zuihral tawh tih Lal Thanzara hian a sawi a. Chutiang hlau chuan tunah ZPM leh MNF-in a ral lo zawk nih inchuhin an hmanhlel a, Congress erawh a tho leh thin, tiin a sawi.