MNF president-in a chanchin a ziak

MNF president-in a chanchin a ziak
MNF president Zoramthanga chuan a chanchin a ziak mek a, khawvela publishing company hmingthang tak Penguin Books chuan an publish sak dawn tih a sawi.
He lehkhabu hi MNF din tirh atanga inremna thlen thlenga MNF history kimchang taka ziak a ni a. Rambuai hma history, rambuai hnu history, East Pakistan-a awm lai leh Dacca tlukchhiat, Arakan ngawpui atanga Akyab, Rangoon, Karachi leh Islamabad-a tlanchhuah thu; inremna tura inbiakna history kimchang, China ram kal, Delhi atanga putchhuah thu leh India sawrkarin Pu Laldenga sawrkar thlak tuma an beih leh inthlim kual vel dan a ziak tih sawiin, “Zirlaiten an chhawr tangkai ngei ka ring,” a ti.
Thawhtannia MNF office Mizo Hnam Run-a inkhawmah Zoramthanga chuan Mizo hnam damchhuahna awmchhun chu nationalism a ni, tiin, “Pathianin keini hnam tlemte pawh ram min pe a. Khawchhak atanga lo tla thlain ram, hnam leh lal thuthlung nen kan nationalism chu kum 1966-ah a lo tho a. Kum 20 chhung hnam thinlung thisena baptis-in a awm. A tawpah kum 1986-ah inremna kan lo nei ta a ni,” a ti.
“He hnam thinlung hi a rei tulh tulh a, hnam tlem zawk tan chuan a hlu tulh tulh a, damchhuahna awmchhun a ni. Kan chhehvel en ila, nationalism tel lo chuan hnam engzat nge buai tawh? Kan hnam martar-te thisen hlutna hi a rei tulh tulh anga, kan hre tulh tulh dawn a ni,” a ti bawk.