Sawrkar laipuiin sum min pek tur min pek loh avanga sawrkar kalta in harsatna a tawh thu sawi hnawm thintu ZPM a sawrkar hnu ah tuna chief minister chuan central hotute hnenah heng ho a zuk dil leh hian, khatihlaia harsatna kha a rawn pholang ta tih leader of opposition Lalchhandama Ralte chuan a sawi.
Zirtawpnia MNF office, Mizo Hnam Runa inkhawmah MNF vice president ni bawk Lalchhandama Ralte chuan, Covid leng avanga central atanga sum hmuh tur cheng vaibelchhe 2300 chuang hmuh loh thu, 15th Finance Commission atanga sum hmuh tur vbch. 56 hmuh loh thu, hemi avanga harsatna namen lo sawrkar kal tawhin a tawh thu an sawi lai khan, harsatna awm lo leh hlawkpui zawk anga puhtu ZPM-in chu harsatna chu a takin an hmu ta a, kumin June 23-a Central Finance minister hnenah heng sum harsatna atanga pui turin chief minister-in a zuk thlen tih a sawi a ni.
“Thenawm ram leh state atangin, raltlan sing chuangin min chenchilh avanga harsatna kan tawh tam tak pawh hre duh lo lui tlattu ZPM chu vawiinah a taka tawngtu niin, kan unaute thlavang hauh aiin, anmahni avanga harsatna tam tak thleng tiin, chhuanlam a zuk siam a. Central-ah pûr zuk chaw in, sawrkar harsatna tawh nasat zia chu kan CM hian a rawn pholang ta a ni,” a ti.
MNF sawrkarin khaw tamtak harsatna chhawk zangkhai nan leh zirtirtu tam tak pension hnaih tawhte sawhnghehna turin school tam tak dinhmun thaa hlankai tak, dan loa kal anga puhtuten sawrkarna an la chelh ngai loh avangin thil awmzia an hrelo tih Education minister hlui Lalchhandama Ralte hian a sawi.
“Tehna felfai tak hmangin cabinet thutlukna anga policy siam tihlawhtling turin recruitment rules duan mek a ni a. April 2024-a peihfel hman tum chu, an zawh hman loh avangin kan sawrkar sa kahthluk tawh chu a kapthlutu zawk nih tumin an cancel a. Sawrkar hmasa thutlukna, district thar chhawmnun leh tih changtlun thlengin, democracy sawrkar kan nihna keng nungin harsatna tam tak lo sutkuak a ni tawh. Sawrkar hmasa thil tih sut leh burha an kal hi democracy zah lohna a ni a. A rang thei ang berin heng school tam takte upgrade-na order hi chhuah turin sawrkar ka ngen a ni,” a ti.
MNF sawrkar harsatna tawh tuna CM-in rawn pholang ta – Lalchhandama Ralte
Get real time updates directly on you device, subscribe now.