MNF sawrkar kaltlanga Pathian rorel dan a langchiang – L Thangmawia, MLA

Zofate rorelna pakhat hnuaia dah tuma Pathianin MNF sawrkar kaltlanga ro a rel dan chu a langchiang hle tih MNF MLA Dr L Thangmawia chuan a sawi.
Thawhlehni khan Lengteng South Block: South Zone chuan Chhawrtuiah political training programme an hmang a. MNF Thalai president, Lengteng bialtu MLA Dr L Thangmawia hian hmanpuiin, MNF Thalai vice president Zodinpuia’n a tawiawm.
MLA Dr L Thangmawia chuan tun term chhungin Mizoramin harsatna a tawk nasa a, Covid avanga harsatna, Myanmar raltlan buaina, Bangladesh raltlan leh raltlan avanga buaina kan tawh zawng zawnga buaina la rapthlak ber Manipur atangin a rawn thleng ve leh tih sawiin, “Pathian rorel dan ngaihtuah chuan MNF sawrkar kaltlanga ‘Zofate rorelna pakhat hnuaia dah’ tih hi a rawn langchiang em em a ni,” a ti.
Bialtu MLA anga a thiltih fuh tawk lohnaah an hriatthiamna a dil tih a sawi a. Pathianin Ama tana thawh leh midang (mipui) tana thawh chu a phal em em zing ami a nih avangin, Pathian tan leh mipui leh ram tan thawh a ngai tih a sawi. “MNF kan sawrkar leh a nih pawhin ram tan enge ka thawh ve theih, tih hre thar zel ang u,” a ti.