MNF sawrkar leh veleh FCAA adopt hi kan hnuklet nghal ang

MNF sawrkar leh veleh FCAA
adopt hi kan hnuklet nghal ang
MNF a sawrkar leh veleh sawrkarin Forest Conservation (Amendment) Act 2023 a lo adopt tawh chu an hnuket leh nghal dawn tih MNF hruaitu Tawnluia chuan a sawi.
Thawhtannia Mizo Hnam Run inkhawmah MNF National Core Committee member Tawnluia chuan, FCAA chu Mizoram tan a tha loa, an pawm thei lo tih sawiin, “He dan hi MNF sawrkar khan Assembly-ah resolution pass-in Mizorama hman a remti loa, a hnawl tawh. Lok Sabha secretary general hnenah pawh 2023 August 28 khan hriattir nghal a ni a. Chuvangin, he dan hi Mizoramah hman a ni lo. ZPM sawrkarin Mizorama hman tura a pawm hi a pawi takzet a. Remna thuthlung zahlohna leh palzutna a ni a, kan pawm thei lo,” a ti.
CSS employee-te dah ngheh tur chungchangah chief minister-in sawrkar hmasa ruahmanna a khirh, tia sawiin, harsatna awm chhanah a puh tih deputy chief minister hlui Tawnluia hian a sawi a. MNF sawrkar khan CSS dah ngheh chu a ngaipawimawh hle a, Study Group siamin department 16-a CSS-te zirchian a ni a. January 2023 khan Study Group report hi cabinet-in a lo pawm tih a sawi.
Drafting Committee siamin CSS Regularisation Scheme an siam a, cabinet-a putluh a nih hmain inthlan puan a ni ta tih sawiin, “ZPM a sawrkar khan a ngai ngaiin a rawn pawm a, a kum chiah an thlak. Tuna CSS-te an nawrh chhan tak hi ZPM sawrkar thiltih liau liau a ni,” a ti. 2024 October 21 khan office memorandum an siam thar a, he memorandum hi CSS employee-te nawrh chhan tak a ni tih a sawi.