MNYF-in dawt sawiah CM puh ‘SASCI sum kan enzui zel dawn’

MNF Thalai chuan SASCI sum chungchangah chief minister chu mipui hnena dawt hrilhah an puh a. SASCI sum suasam a nih dan chu enzui zel an tum tih an sawi.
May 14-a Lawngtlaia MNF Thalai Hqrs., MNF Thalai Sub Hqrs. Lunglei, MNF Thalai District Hqrs MADC, LADC leh CADC hruaitute thukhawm thuchhuak chuan, chief minister Pu Lalduhoma’n an sawrkar tirha press conference a neihah SASCI sum chu single nodal agency (SNA) a dah vek tawh angin dawt a sawi a. MNF Thalai-in an chhuichianin SASCI sum a sawi hi SNA account-ah kumin May 8 thleng khan dahchhuah a la ni loa, K.Deposit-ah Finance department-in a la kawl tang reng tih an hmuhchhuah thu a sawi.
May 3-a CM-in press conference a neihah 2022- 2023 kuma cheng nuai 40000 sanction atanga nuai 20000 chu lapse anga a sawi chu dawt a ni, tiin, ‘Nuai 40000 hi sawrkar laipuiin a release kim vek a. Hna nuai 40000 man thawh niin, bill pawh pek a ni,’ an ti.
Kum 2023- 2024 a 2nd instalment sum nuai 23331 lapse chungchangah pawh chief minister hian MNF sawrkar tih lapse a tih chu dawt a nih thu MNF Thalai hian sawiin, ‘1st instalment nuai 26669 chu ZPM sawrkarin financial year tawp ni – March 31 pel rawka dan kalha kawl tanga a implementing agency-a a pekchhuah loh vang a ni a. SASCI guidelines ang chuan, sum dawn ni atanga ni 10 chhungin Finance department-in 1st instalment sum hi a hmang /pe chhuak tur a nih laiin, ZPM sawrkarin Finance-ah K.Deposit-a an kawl tlat vangin 2nd instalment tur nuai 23331 chu a rawn chhuak thei loa, a lapse ta a ni zawk,’ an ti bawk.
CM chu ama tih dik lohah midang puh a ching tih an sawi a. SASCI sum ‘dere’ pawh pek chhuah a nih loh lai leh contractor-te nasa taka ti khawtlaia an hna cut sak an nih lai a, sum lapse chhana implementing department leh contractor-te puh an ni chuan ZPM sawrkar chu mawhphurhna la ngam lo sawrkar a nih zia a tichiang hle tih an sawi a ni.
Nikum SASCI Part-I 2023-24 1st instalment sum chu a implementing department-a pe chhuak nghal turin ZPM sawrkar an phut tih MNF Thalai hian an sawi a. A pe chhuak lo a nih chuan a tul anga hma an lak tur thu a sawi bawk.