Mocha thlipui tleh mai thei

Mocha thlipui tleh mai thei
Zirtawpni leh Inrinni-ah thlipui, Mocha tia a hming an vuah a tleh mai thei a, mahse State Meteorological Centre lam chuan hlauva chi-ai tur a ni lo tih an sawi.
India Meteorological Department a\anga thu an dawn danin, Bay of Bengal tuipui chhim chhakl lama cyclone insiam chu Ningani tuk khan thlipui tak tak cyclonic storm-ah a inlet a, chu chu Mocha tiin a hming an vuah. Chu thlipui chuan Ningani tuk khan Port Blair a\anga chhim thlang lam km 510 vel a thleng a, hmar thlang lam a pan leh a, Ningani zan zanlaiah thlipui na zawk ‘severe cyclonic storm’-ah inlet tura ngaih a ni. Chumi hnuah hmarchhak a pan ang a, Zirtawpni-ah thlipui na tak ‘very severe cyclonic storm’-ah a inlet ang a, May ni 13 tlai lam hi a thawh nat ber lai ni tura ngaih a ni. May ni 14 zing lam a\angin na lo tial tial tura ngaih a ni.
State Meteorological Centre enkawltute chuan he thlipui hian Inrinni leh Chawlhni-ah Mizoram hmun hrang hrangah ruah a thlen turah ngaih a nih thu an sawi a, thlipui hi hlauva chi-ai tur a ni lo tih sawiin, Mizoram hi Mocha thlipui kawng ni lovin a kawng hrul a nih thu te, a siper a rawn thleng ve mai thei tih a nih chauh thu te an sawi. Chawlhni-ah thli hi darkar khata km 50-60 velin rei vak lo a tleh mai thei tih a nih thu an sawi bawk.