Mock Exercise

Chhiatna a thlen thulha chhanchhuah leh chhawmdawl hna kalpui dan tur, a taka enchhinna Mock Exercise/Mock Drill chu National Disaster Management Authority leh Disaster Management & Rehabilitation Department bultumin Mizoram district tinah nimin khan kalpui a ni a. Lemchan ang deuh a ni a, engkim ruahmanlawkna hnuaia kalpui a nih avangin, a tlangpuiin ruahman lawk anga tlingtlak theih a nih thin avangin, mock drill/mock exercise hi ‘a hlawhtling’ duh viau zel.
Lirnghing na tak thlen theihna Zone VI-ah kan awm leh tawh an ti a, mithiam ten. A hma khan Zone-V an ti a, tunah chuan Zone thar ‘Zone-VI’ a awm a, chutah chuan Mizoram hi kan tel leh ta. Khawvel hmun hrang hrangah leh India ramah ngei ngei pawh lirnghing na tak, chhiatna nasa tak thlentu kan hmu thin a. Mizoramah hian lirnghing hrim hrim chu a thleng tam ve viau a, mahse ‘na tak’ a la awm lova, kan la vannei hle.
Lirnghing nat dan tehnaa magnitude 7.1 hi Mizoram hian a tak takin tawng ta ila, kan ram leilung nghet lo tak han en hi chuan, kan tuar na viau thei tih a lang a. Tuna enchhinna (mock drill)-a lirnghing hian min khawih na vak lo a, a tak takah chuan 7.1 te hi chuan kawngpui a ti khichatin electric bante pawh a ti tlu rem remin, signal tower-te pawh function thei lovin a awm a rinawm a. Chutiang hun, power leh inbiakpawhna bakah, road communication a lo chhiat thulha chet lak dan tur hi ‘mock drill’ hmanga kalpui mai theih a ni tawh lova, mahse a tak taka thleng thei a nih avangin, chutiang a thlen huna hman theih tur hmanrua kan lo inring lawk reng em tih hi zawhna pawimawh tak niin a lang.
Lirnghing tak tak, na tak ni bawk si a lo thlen hunah chuan, tuna mock exercise-a tluang taka tih pur pur theih ang hi a tih theih dawn loh tih ngaihtuahna hmang chunga chhiatrupna lo thleng thei hmachhawn dan turah ‘thluak exercise’ lak that a pawimawh dawn hle. Chumi atan chuan sum leh pai pawh senso a ngai dawn. Chumi tur chuan kan inbuatsih reng em tih hi a pawimawh.
Aizawl khawpui hi lirnghing na takin nuai ta se, kawngpuite a lo khi chat thei a, chutiang hunah chuan lirthei tlan nana lei khi/kaka thir lei han dawhkai mai theih tur ang chi te hi lo ‘stock’ sa a tul maithei. Inbiakpawhna rin pui ber signal tower a chhiat palh pawha inbiakpawh theihna tur te pawh lo inrin lawk a ngai ang.
Mizoramah chuan pawl lian tak YMA kan nei a, chhiatna a thlen thulha che ber pawh YMA hi a ni. YMA branch tinte hian chhiatna a thlen thulha hman tur hmanraw pawimawh hi nei theuh thei ila, inkalpawhna a lo chhiat chang pawhin mamawh a inban tawn zung zung theih ang a, chu chuan nasa takin min pui theiin a rinawm. Mock Drill te hi a YMA ang zawng te pawha la kalpui chi niin a lang; kan ti ta sa sa, a khawtlang (Veng) bil ang te pawhin maw le!