Huna Kawlvawm
-- Advertisement --
Lok Sabha Speaker thlan hun atan June 26, 2024 ruat a ni. BJP chu party malin Sorkar siam thei a ni lo a, NDA hnuaia a thawhpui party dangte nen sorkar an siam a, Council of ministers ruatah NDA hnuaia party-te beisei ang minister hna chanvo pek an ni lo tih hi hai chi a ni lo.
Opposition INDIA bloc lam chuan Lok Sabha Speaker hi BJP chhung atang ni loin National Democratic Alliance (NDA) hnuaia a thawhpui Janata Dal (United) leh Telugu Desam Party atanga thlan ni se tiin thawm an nei pang a, hetiang thawm hi awm mah se Nitish Kumar kaihhruai Janata Dal (United) chuan BJP remruat an pawm tur thu an sawi tawh a, hetih lai hian Chandrababu Naidu kaihhruai TDP chuan speaker tur hi ro rel lai (ruling alliance) atangin pawm tlan theih thlan chhuah ni se an ti.
Janata Dal (United) leader KC Tyagi chuan nimin Inrinni khan JD(U) leh TDP te hi NDA chhunga awm an ni a, chuvang chuan BJP in Speaker ni tura an thlan chu an thlawp dawn tih a sawi. “JDU (Janata Dal-United) leh TDP (Telugu Desam Party) te hi nghet leh lungawi takin NDA chhungah hian kan awm a, BJP-in Speaker ni tura an chhawp chhuah (nominate) apiang chu tu pawh ni se kan thlawp (support) dawn a ni,” Tyagi chuan ANI hnenah a sawi.
Hetih mek lai hian TDP national spokesperson Pattabhi Ram Kommareddy chuan The Indian Express hnenah hetiang hian a sawi thung a, Speaker candidate tur chu NDA chhunga awm party ten an rel tlang tur a ni.
“NDA a thawkho party te hi dawh kan khat kilin Speaker atan kan candidate tur chu kan relho anga rem kan ruat ang a, kan inlungrual tlanna kan hmuh hunah candidate tur kan hmu ang. Kan pawm tlan theih candidate chu NDA chhunga party te hian kan thlawp ngei ang keini TDP pawh tiamin,” tih thu chanchinbu mi hnenah a hrilh.
BJP hian Lok Sabha seats 240 an la a, seat 32-in majority an phak lo a, TDP seat 16 leh JD(U) seat 12 nen pawh majority hi an la phak chuang lo a, NDA chhunga party awmte nen majority chu an khum thei a ni. Hetiang hi ni mahse TDP leh JD(U) te hi dinhmun pawimawh tak lal siam theitu dinhmunah an ding a – Prime Minister Narendra Modi sorkar tum thumna siam tura a kila lung pawimawh tak an ni.
INDIA bloc zinga awm AAP chuan Speaker dinhmunah hian JD(U) emaw TDP emaw an awm tur a ni tih thu kar hmasa khan an lo sawi tawh a ni.
Senior Congress leader Ashok Gehlot pawhin BJP hian Speaker hi hauh an tum anih chuan JD(U) leh TDP MP te chu ruk then tumin an awm (will start horse-trading of JD(U) and TDP MPs) ang, tih a sawi.
“TDP leh JD(U) te mai ni lo ram chhung mipuite hian Lok Sabha Speaker thlan chungchang hi nghakhlel takin an lo thlir a, BJP hian hun lo kal zel atan democracy dan pal zut an tum anih loh chuan an thawhpui party atangin Speaker hi an kian tur a ni,” tih thu Ashok Gehlot hian ‘X’ ah Hindi tawngin a sawi.
“Tun dinhmunah BJP hian Lok Sabha Speaker hi anmahni chhung atanga an ruat phawt chuan, TDP leh JD(U) te MP hi ruk turin (should be ready to see horse-trading of their MPs) an inring reng thei a ni,” a ti.
BJP-in NDA chhunga a thawhpui party atang hian Prime Minister Narendra Modi-a Cabinet-ah chanvo tam tak pek an ni. Amaherawhchu, BJP MP te hi NDA hnuaia lian ber an nih avangin chanvo tha leh pawimawh zawng zawng an chang fai deuh vek a ni.
HEI VE THUNG HI
Atal Bihari Vajpayee Sorkar tum hnihna (minority Govt) ah khan TDP hian pawn lam atangin Sorkar an thlawp a, TDP hian Speaker post an phut thung a, kum 1 leh ni 207 ro an rel hnuin eng emaw avangin sorkar thlawptu party thenkhatin sorkar an thlawpna February 1999 khan an hnuk dawk a. Sorkar chuan No confidence motion a hma chhawn a, NDA partner party zinga MP thenkhatin Sorkar do zawnga an vote thei bawk si a, hetiang hun khirh takah hian Congress MP Giridhar Gamang chu Orissa Chief Minister a lak luh tawh chu he motion-a vote thlak phalsak chungchang chu Lok Sabha-ah an inhnial nasa mai a, Speaker Balayogi (TDP) thu neihna a nih avangin vote thlak a phalsak ta a, Vajpayee sorkar chu vote 1 hmanga paih a ni ta a, NDA vote 269, Opposition 270 vote.
Hetiang thil thleng tawh hi BJP hian an theihnghilh awkawng lo ang, chuvangin Opposition te duh dan anga NDA partner TDP, JD(U) atanga Speaker candidate dah hi an rem tih theih a rinawm loh hle.
Source :
Hindustan Times: June 16, 2024