Modi-a leh Russian First Dy. PM Manturov inkawm

Modi-a leh Russian First Dy. PM Manturov inkawm
Russian First Deputy Prime Minister Denis Manturov-a chuan Ningani khan Prime Minister Narendra Modi-a leh External Affairs Minister S Jaishankar te kawmin energy leh lei tha kaihhnaih thil pawimawh hrang hranga thawhhona hmasawn dan tur a sawipui.
Modi-a chuan social media-ah Manturov-a nen hian ‘sumdawnna, lei tha, inpawhna leh mipui leh mipui inkungkaihnaah thawhhona tha an neih theih dan tur’ an sawi tih a tar lang a. Nikum December thlaa President Vladimir Putin-a’n New Delhi a tlawh tuma India-Russia Summit-a hmalakna tura chhawpte tihhlawhtlinna dan chu lawmawm a tih thu a sawi bawk.
Jaishankar-a pawhin Manturov-a nena an inkawm hnuah ram pahnihte chuan sumdawnna, industry, energy, lei tha leh inpawhna lama thawhdunna lam an ngaih pawimawh thu a sawi a. Social media-ah an pahnih hian technology, thil thar chin chhuah leh ram leilung hausakna vâng chi lama remchang thar an dap bawk tih a tar lang.
Hei bakah hian Jaishankar-a leh Manturov-a hian an chhehvel leh khawvel huapa thil thleng hrang hrangte an sawi dun bawk a, Asia khawthlanga buaina chhuak chungchang pawh an sawi bawk.
Tun hnaia US-in India-in Russian tuialhthei a lei chhunzawm theihna tura hrekna a siamte a ngaihhnathiam hnuah Russia chu a leisakna lian ber a ni leh ta a. Israel leh US-in Iranian sipaite beihna avanga buaina chhuak avanga Asia khawthlang atanga bungraw phurh a buai avangin Russia chu energy lakna atan a pawimawh leh tawh hle a ni.
India hian Asia khawthlang buaina avang bawk hian lei tha belhna turin Russia lam a hawi mek bawk.
Manturov-a’n a tlawh hma ni khan Indian Foreign Secretary Vikram Misri-a leh Russian Deputy Foreign Minister Andrey Rudenko-a chu New Delhi-a foreign office-a inbiain ram pahnihte inlaichinna an sawi dun.
Manturov-a’n India a tlawh hi nikuma Pakistan nena ni li chhung an inbeihna, Operation Sindoor-a an system that avanga Indian sorkarin Russia atanga S-400 air defense system panga lak belh a tum hnuah a ni.
US-in Countering America’s Adversaries Through Sanctions Act (CAATSA) hnuaia hrek an nih theih thu sawi mah se October, 2018 khan India hian Russia nen $ tluklehdingawn 5 inremna an siam a, S-400 air defense system panga lei an tum a. Russia hian tun thlengin heng system pathum hi a pe tawh a, pahnih dang pek leh tur chu Ukraine-a indona avangin a buai phah mek.