Modi-a’n a dan siam a zawm dawn em ti

Tihar Jail atanga chhuah a nih hnuah campaign thlak nghalin Delhi Chief Minister Arvind Kejriwal chuan kum 2024 Lok Sabha inthlanah Prime Minister Narendra Modi tana vote thlak a nih chuan Prime Minister atan Amit Shah vote-na ang a ni ang a ti a. PM Modi chuan September 17, 2025 ah kum 75 a tlin tawh dawn avangin politics a chawlhsan tawh dawn a ni a ti.
Kejriwal thusawi hi chhang nghalin Union Home Minister Amit Shah chuan Prime Minister Modi chuan PM hna full-term in a chelh ang ti zui nghalin BJP constitution chuan retirement age siam a nei lo tiin a sawifiah nghal vat thung.
Kejriwal thung chuan Modi ngeiin BJP leader te chu kum 75 an tlin tawh chuan an chawl tur a ni tiin thupek a lo pe tawh a ni a ti thung a. BJP party chungah thuneihna inchuhna nasa tak a awm mek ti bawkin Kejriwal chuan, “BJP ten sorkar-na an siam a nih chuan a hmasa berin Uttar Pradesh Chief Minister Yogi Adityanath chu an dah bo ang a, chumi hnuah Amit Shah chu Prime Minister an nih tir ang. PM Modi hian Amit Shah tan vote a zawng mek a. Amit Shah hian Modi guarantee te a tihlawhtling thei ang em?” tiin a sawi.
“Modiji ngeiinkum 2014 khan dan siamin BJP-ah chuan mi tupawh kum 75 a tlin tawh chuan a chawl tur a ni a ti a ni. A hmasa berah L.K. Advani an chawlhtir a, Murli Manohar Joshi, Sumitra Mahajan leh Yashwant Sinha te an chawlhtir zui leh a. Chutianga an kal zel dawn chuan zawhna ka zawh duh chu BJP te PM candidate tu nge?” tiin Kejriwal chuan a sawi bawk a.
PM Modi tum ber chu “one nation, one leader” mission tihhlawhtlin niin ‘dictatorship’ diktak kalpuiin Opposition leader te jail ah a khunga BJP chhungah amah elthei deuh te chu ‘an politics a tihtawpsak mai’ tiin a sawi.
“BJP te hian Lok Sabh inthlanah chakna an chang a nih chuan Opposition leader te Mamata Banerjee, Tejashvi Yadav, M.K. Stalin, Pinarayi Vijayan leh Uddhav Thackeray te chu lung inah khung an ni vek ang. BJP chhunga hruaitu ni thei tur te pawh an dim dawn chuang lo, Shivraj Singh Chouhan, Vasundhara Raje, Manohar Lal Khatta leh Raman Singh te pawh an career an tihtawpsak vek tawh a. An la hmabak chu Yogi Adityanath a ni” tiin Kejriwal chuan a sawi bawk.
June 1 thlenga interim bail a chhuak mek Kejriwal chuan ram chhungah zinkualin mipui te chu ‘dictatorship laka India humhim turin a ngen dawn, a ti bawk a.
BJP te hian AAP top leader pali te mana lung ina khungin AAP an tihchhiat vek theih an ring a, mahse, an ruahmanna te chuan a vawlet zawk dawn a ti bawk a.
“Ka lakah fake case an siam a, Chief Minister atanga ka ban an ring a ni, mahse, an phiarrukna te a hlawhchham a ni. Hemant Soren ngei pawh kha bang lo tur a ni maw le,” tiin Kejriwal chuan a sawi a.
Kejriwal thusawi hi chhanglet thungin Amit Shah chuan, “Arvind Kejriwal leh a company te leh INDIA bloc te ka hrilh duh chu Modian kum 75 a tlin hnaih avangin lo lawm viau suh u. BJP cosntitution ah hian i chawlh a ngai tih inziahna engmah a awm lo. Modi-an term a hmang zo ang a, ram hi a kaihruai ang. BJP ah buaina engmah a awm lo,” tiin a sawi.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More