Modi-a’n Jeddah tlawh, inremna paruk vek ziak

Modi-a’n Jeddah tlawh, inremna paruk vek ziak
Prime Minister Narendra Modi-a chuan Thawhlehni atang khan Jeddah tlawhin India leh Saudi Arabia thawhhona tur, memoranda of understanding (MoU) paruk an ziak dun ang.
Modi-a zin tur chungchang sawitu sorkar mi pawimawh chuan Crown Prince leh Saudi Arabia Prime Minister Mohammed bin Salman Al Saud nen an inkawmnaah Hajj pawh sawipuiin Indian biakzinte tana kawng zau zawk hawn theih dan tur an sawi dun.
Ram pahnihten inremna an ziahte hi vanthengreng, energy, hriselna, science leh scientific research, nunphung leh technology sang zawka thawhho theih dan tur hrang hrang a ni.
Thawhlehni zana Riyadh-a hruaitu pahnihte inkawm hma hian a hma zan mai, Thawhlehni zan pawh khan thawhhona tur ziah tur atan hian sorkar mi pawimawhte chu an indawr buai hle a. Heng zingah hian sumdawnna, investment leh ram venhimna thil te pawh a sawi.
Modi-a hi Thawhlehni chawhnu khan Saudi Arabia-a Crown Prince Mohammed bin Salman-a’n a sawm angin a thleng a, Indian prime minister zingah kum 40 chhunga Jeddah tlawh leh hmasa ber a ni.
“Jeddah hi India leh Saudi Arabia inpawh tawnna atan kum za tel lo pawimawh tawh a ni a. Jeddah hi ram pahnih insumdawn tawnna atana lawngchawlhna a ni a, Mecca luhka a ni bawk. Umrah leh Hajj-a kal reng reng chu Jeddah-ah hian kai hmasa phawtin Mecca an pan leh chauh thin a ni,” tiin Saudi Arabia-a Indian palai, Arabia Suhel Ajaz Khan chuan prime minister-in a tlawh hma lawk hian a sawi.
“Hajj hi thil pawimawh tak niin India sorkar pawhin a ngai pawimawh em em a, Ministry of Minority Affairs chuan he huna Indian tel ve theihna tur remchang a siam thin. Hruaitu pahnihte inbiaknaah hian thil tam tak sawi a ni dawn a, Saudi sorkar leh India hi Hajj chungchangah pawh an inrem ang,” tiin palai hian a sawi lawk bawk.
India-in Hajj-a quota a neih hi kum 2025 khan 1,75,025 niin kum 2014 kha chuan 136,020 chauh niin a pung hle a. Hetih rual hian Combined Haj Group Operators-in contract chungchangah inremna a tihkhawtlai avangin Hajj-ah hian India-in a quota neih zawng zawng a tir thei dawn lo va, Indian 42,000 vel chu sakhaw thila biakzinnaah hian kuminah an kal kim thei dawn lo.
Modi leh Crown Prince hian Strategic Partnership Council thutkhawm vawi hnihna an kaihruai dun dawn bawk a, he council hi Saudi prime minister-in kum 2019-a India a tlawh tuma ram pahnih thawhhona a that zawk theih nana an din a ni.
Nilainiah hian kum 2016-a Saudi Arabia-a civil mite chawimawina sang ber lo hlan tawh, Modi-a hian thil siamna hmuna Indian chhawrtute a tlawh kual bawk ang.