Modi-a’n thil awm sa sawi thar

Khaw chhiat vangin Aizawl a thleng thei lo a, Aizawla a tih turte pawh Lengpui atangin a ti ta ringawt. Mizoram a tlawh hma atanga a haw hnu thlengin Narendra Modi-a hmingin social media a luah.
Kar hmasa Inrinni-a Mizorama a zinin India ram prime minister Narendra Modi-a khan thil hrang hrang a sawi a, thil thar a awm lem lo.
Modi-a hian Kawrthah-a Residential School, cheng vaibelchhe 33 senga sak leh cheng vaibelchhe 24 senga sak Tlangnuam-a Eklavya Model Residential School te a hawng a, heng hi thil thar a ni lo, hun hmasa lama bul lo tan tawh a ni. Kawrthaha he sikul huam chhunga khelmual phei chu hun engemaw chen an lo hmang tawh. He sikul hi 100% zawh fel a la ni lo deuh tih thu dawn a ni.
Cheng vaibelchhe 500 sengin Aizawl Western Side bypass road siam a nih tur thu a puang a, hei hi thil thar a ni lo, 2022-ah khan unionm budget-ah a awm daih tawh.
Mualkhanga 30 Tounsand Metric Tons Per Annum Gas Bottling Plant siamna tur cheng vaibelchhe 226 senna tur a puang a, hei pawh thil thar a ni lo. He gas bottling plant hi 2006-a din a ni a, safety norms a phak loh avanga siamthat niin, 2021 khan Mizoram sorkarin hemi atan hian ram hectare 2 a lei belh nghe nghe.
Aizawl Western Side bypass road leh 30 Tounsand Metric Tons Per Annum Gas Bottling Plant hi a sum hrawm na deuh chu a ni a, thil thar a ni lo ve ve.
Cheng vaibelchhe 70 senna tur Chhimtuipui (Tuipui Ferry) lei pawh thil thar a ni lo a, February ni 27 khan Ministry of Road Transport and Highways-in tender an chhuah daih tawh. Cheng vaibelchhe 45 senna tur a puan Thenzawl – Sialsuk kawngpui (via Sathlur & Lau river) pawh thil thar a ni lo, April ni 2 khan Mizoram PWD-in hemi atan hian tender an chhuah tawh.
Khelo Multipurpose Hall, Tuikual-a mi tur, cheng vaibelchhe 12 senna tur pawh March ni 28 khan sum sanction a ni tawh. Cheng vaibelchhe 32 senna tur Khankawn to Rongura Hmun kawngpui, Serchhip district atan pawh May ni 5 khan PWD-in tender an chhuah tawh a, thil thar a ni lo. Thil thar a nih vena lai chu, he kawng hi kawnf sial thar tur liau liau a ni.
“Prime minister hian thil awm sa, thiltih mek te a rawn thil thar sawi a mai e. |henkhatah te kha chuan sum pawh a awm fel sa hial ang,” chanchinbumi pakhat chuan a ti.