Modi-an UCC aiah ‘secular civil code‘

A zawn zata tum 11 Red Fort atanga Independence Day thuchah a sawiah Prime Minister chuan BJP ideology tihhlawhtlin tum ber Uniform Civil Code chu sawi dan danga sawiin ‘secular civil code’ tiin Constitution-a inbilh leh dan hmaa intluktlan vekna tur a ni, a ti.
“Supreme Court chuan India ramah Uniform Civil Code a ngaihtuah chamchi tawh a. He rama mi tam ber te chuan civil code an duh a, tuna kan neih mek hi chu communcal civil code a ni. Tuna kan mamawh ber chu sakhuana behchhana inthliarna tihbo nan secular civil code a ni. Kan consitution siamtute vision tihhlawhtlin hi kan mawhphurhna a ni” tiin Prime Minister Modi chuan UCC a duhzia sawi lan nan Indian Constitution a Directive Principles of State Policy chungchang a sawi a.
Tuna taka ‘secular civil code’ tia a sawi hian danglamna thuk tak neiin BJP te chuan Lok Sabha-ah seat 240 chauh neiin majority nei lovin Telugu Desam Party (TDP)leh Janata Dal (U) te puihna hnuaia awm an ni a, UCC chungchangah hian party pahnih te hian BJP ngaihdan an thlawp lem lo.
Prime Minister chuan a thusawiah Uniform Civil Code mai a ni lo, contemporary issue hrang hrang khawih telin opposition ten an sawisel na hle bawk.

Hmeichhiate laka hleilenna chhui chian vat
West Bengal sorkar leh Kolkata-a doctor pawngsuala thahzui hming hmerha sawi lang si lovin Prime Minister Narendra Modi chuan hmeichhiate himna chungchang a sawi a.
“Kan nu, unaunu, fanu te sawisain an awm mek a, mipui nawlpui thinrimna a nasa a, kei pawhin ka hre thei a ni. He ram, vantlang leh state sorkar ten hei hi kan ngaih thutak a ngai a ni. Investigation rang taka neihin thil tisualtute chu hrem tur a ni a, media te pawhin heng misual te hi an hming tarlangin timualpho sela, chu chu nakin zela timna thlentu a ni thei” tiin a sawi.

Economy tihngelngheh loh tumna
India ram economy tihngelngheh lova siam tumna a awm mek tiin a sawi bawk a, hei pawh hi Adani group chungchanga Hindenburg research report a sawina nia ngaih a ni a, a hma pawhin he mi chungchangah hian BJP thupuangtu chuan Indian market tihngelnghehloh tumna a lo ti tawh.
“Mi thenkhatte hian kan hmasawn an duh lo, chung mite chu rilru dik lo, rilru chhia pute hi he ram hian a hriat a ngai a, heng mite hian anarchic forces an thlen thei. Khawvel hian kan values leh history a hriaa India prosperity chuan khawvel hnianghnarna a thlen a ni” tiin a sawi.
Eirukna nuai bo tuma a beihna chu chhunzawm zel a tum thu sawiin Prime Minister Modi chuan eirukna nuaibo a tumna kawngah eng pawh a huam thu a sawi bawk.

Bangladesh Hindu te ngaihtuah
Bangladesh chungchangah Prime Minister Modi chuan, “|henawm ram an nih angin Bangladesh a thil thleng hian min ti hlauthawng a ni. A rang thei ang bera thil a fel ka beisei a. Hindus leh minority community te himin an awm ngei tur a ni. India chuan a thenawm ramin remna leh muanna kawng zawh se a duh a. Inremna a awm theih nan theihtawp chhuahin Bangladesh hmasawnna kawngzawhah duhsaksa sang ber kan hlan a ni,” a ti bawk.
‘Secular civil code’ a aupui piah lamah Prime Minister Modi chuan parliament leh state assembly te a ruala inthlan a ngen bawk a, party tin te chu ngenin ‘Constitution hrethiam’ te chuan he issue hi ngaihtuah nawn se a ti bawk a. Chutih rualin dynastic politics chu beih let tur tia sawiin thalai nuai khat zinga pakhat tal political family ami ni miah lovin Panchayat leh parliament thlengin political field luhchilh se a duh thu a sawi bawk.
Prime Minister chuan sawisel hlawh NEET chungchang pawh sawiin Medical education entrance exam-ah a sorkar chuan seat 75,000 in a tihpun tur thu a sawi bawk.

Report Card
Kum 11 chhunga Independence Day thuchah a sawiah a sawi rei ber niin minute 98 chhung sawiin kum 2016 a minute 96 a sawi aiin minute hnihin a awh rei zawk. Prime Minister chuan tun hnai kum sawm chhunga a sorkar report card pholangin hmasawnna hna an thawh te sawi langin chung zingah chuan Nyay Sanhitsas or criminal leh police procedural codes chungchang te pawh a sawi lang a ni.
“Reform lian tak kan kalpui a. Mirethei, middle class leh deprived section te, thalai te nunah reforms kan siamsak a ni” tiin a sawi a. Panchayat atanga Central sorkar thlengin nun tihawlsam theihna tura hnathawka mission mode a che turin a ngen bawk.