MONITORING

Zion Lalremruata
Monitoring han tih hian  eng hna pawh a nih phung ang taka thawh a ni em tih endik a vil zui hi a ni, monitoring ngaih pawimawhna hmunah reng reng a mawhphurtu mihring tan inthlahdah a thiang lova; hnathawh quality pawh a tha thîn a ni.
Pragna Bhawan, Agartala-ah Dt 27-29, March, 2011 chhung khan ‘Workshop on Emerging Challenges in Agriculture & Allied Sectors in North Eastern Region’, heng Vigyan Prasar, Deptt of Science & Technology, Govt of India te, Agriculture Deptt, Govt of Tripura te leh All India Peoples’ Science Network Delhi te buatsaih ah khatih laia AMFU Gen.Hqrs-a President Pu R.Lalduhawma(Fam) nen kan tel ve hlauh mai a. He hun buatsaihtute hian min lo dawngsawng thain khual tha thlenin min lo thleng a, kan tlangnel sarh mai a. Workshop huaihawttute hnenah hian an Chief Minister(CM) hmuh a han titi pui ve kan duh thute kan han sawi fiam a (an CM hi he Workshop-a Khuallian tur a nih vangin). Ruahman lawk angin an CM chuan Workshop hawnna te lo neiin urhsun takin Scientist ho thusawite a lo ngaithla a. Kan beisei ruk deuh mahse beisei em em si lohin kan hming an lo lam ta khauh khauh mai a tichuan, India rama Chief Minister eiru lo bera sawi leh hmingtha tak mai Pu Manik Sarkara chu kan President nen chuan kan kawm ve ta a ni. A Sawrkar enkawl dante kan han zawt a, “Monitoring hi ka ngai pawimawh em em a, Physical leh Financial Achievements te keimah ngeiin ka Monitor thin”, tih min hrilh a ni. A tawiawmtute pawh kha an hrawl hle hlawm a, inthenawm na na na chu min lo dawngsawng tha hle a ni. Hemi tuma kan thil hmuh tha kan tih deuh chu Emeritus Scientist PS.Rama Krishnana khan Tripura Sawrkarin Rubber a mala(mono-culture) a chin tir vak mai chu a sawisel a; Scientist pain thu a sawi zawh veleh hian Pu Manik Sarkara hi lo dingin Rubber nena chin pawlh tur thlai/thei kung thlanga hmalak dan tur Ni 10 chhunga Chief Minister dawhkana thlen tir hman ngei turin heta tel ve Principal Secretary, IAS val kha order a pe hmiah mai a ni. He leiah hian mihringte pawh inmamawh tawn vek kan nih angin heng Pathian thil siam dangte pawh hi an ni vek a chuvangin, Agriculture leh a kaihhnawih thila hmalakna reng rengah a mal ngawka (mono-culture) kalpui lovin thil dang nena chin pawlh/ kalpui thiam a finthlak ber awm e.
Tripura sawrkar chuan an hmalakna hrang hrangte min fan tir a heng atang hian thil tam tak kan rama seng luh tlak kan hmu nual a ni, tlem han tarlang ila:-
1. Thingtlang(Rural) leh khawpui hmasawnna an kalpui dan a inrualkhai hle, hmun kilkhawr zawka in kalpawhna kawngte kha a tha em em vek mai.
2. Agriculture leh a kaihhnawih hoah tunlai thiamna thar(new technology) an hmang uarin an advanced hle.
3. Hmasawnna hna thawh kawngah field-a awm/thawkte Office lam an thuam thain lirthei lam thleng pawhin an thuam tha hle.
Tuna kan Sawrkar hian ram hmasawnna hna thawhte endika a tul anga hma la turin ‘Mizoram State Project Monitoring Commitee(MSPMC)’ chu Dt 22,Jan,2024 khan a din a, Chairman chu Chief Minister niin member ah hian kohhran aiawh MKHC te, Political Party hrang hrang heng BJP, INC, MNF, ZPM aiawh pakhat theuh bakah tlawmngai pawl heng CYMA, MHIP, MSU, MUP, MZP atang te in pakhat theuh ruat an ni a. Heng bakah hian he committee khaidingtu ber Vice Chairman(Minister of State rank) leh Secretary (Mizoram Sawrkar a Secretary rank) te chu thla khata Re 1 hlawhin a ruat bawk a. He Committee a member awmte han en mai pawh hian Mizoram tan chuan hei bak chu tih theih tur khawpa pawimawh hi a awm kher awm love. He Committee hi din a nih atangin hna/project hrang hrang sawmthum(30) chuang hret an en dik/monitor tawh a; siam that ngai laite pawh siam that a ni hlawm. Tin, kan Chief Minister Pu Lalduhoma’n a thawhpui Minister hrang hrangte hnathawhte a thlir let/review pui thin te pawh hi thil chhinchhiah tlak leh chhunzawm tlâk tak  a ni.
Ram Thianghlima kan zin tumin Jerusalem chhûnga kan tlan lai hian kan Tour Guide Juda pa khân Building lianpui mai hi min kawhhmuh a, chu Building chu a lo lâr lai tak a ni nghe nghe a: an Prime Minister Ehud Olmerta chuan chu Building chu kha ta a lo sak tir a lo ni a. Jerusalem Municipal lamin a sakna tur hmun tûra an thlanah sa lovin an Prime Minister chuan a thuneihna hmangin a sakna hmun tur a lo sawn a, hemi avang hian Ehud Olmerta hian Jail bang a zut phah a ni. An Prime Minister-in thuneihna a hman sualna hi an en liam ve mai lo kha vawiin thleng hian ka la ngaihtuah fo thin, Mizoram hmun tam takah Building/Godown hrang hrang hman tangkai loh a hluihlâwn tam tak awmte hi thuneihna hmansual rahte pawh a ni ve ngei ang,  mawhphurtu berah hian MLA te emaw Department Officer te emaw puh vek a dik lovang a khawtlânga thuneitu hrang hrang hêng political party te, tlawmngai pâwl te leh kohhran lam thleng pawh hian mawhphurhna kan nei vek a ni. Ram leh Hnam chakna leh dinchhuahna tûr chuan khua leh tuite nunphung hian thui tak a hril a ni.
Mizoramah hian tunhma atang tawhin hmasawnna hna thawhna tur sum tam tak Sawrkar laipui chuan min pe reng thîn mahse, kan sum hmuhte dik lo taka kan hman thin bakah kan hnathawhte a quality a chhe em em fo mai a; hei hi a chhan bul berah chuan Mizoram Sawrkarin ram hmasawnna hnathawhte a endik in a vilzui loh vang a ni ber a ni. Lui pawh a hnar a fim chuan a mawng lam pawh a fim thin an tih angin Mizoramah chuan Mc Donald Hill-a thu Chief Minister hi eiruk leh hlemhletna kawngah han fihlim zel se la, a hnuai lam pawh a dik zel a ni mai.
E, tak ana Tripura Chief Minister in Financial leh Physical achievements/hlawhtlinnate ka monitor/endik thîn a tih kha he Workshop-a lo tel Tripura mi hna hrang hrang thawkte kha kan zawt a; an CM chuan kan bula a sawi ang ngei chuan hma a lo la thîn. An CM hi an chhuan hmel viau, fiamthu thawhnan an hmang ve lo…

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More