April Countdown

Mizoram sawrkar aiawh leh Assam Rifles aiawh ten nikum October ni 23, 2024-a Mizoram House, New Delhi-a Memorandum of Agreement an lo ziah fel tawh angin, April ni 1, 2025 hi Assam Rifles-in Mizoram mipui kuta an ram luah mek thenkhat an hlan ni tur a ni a. Vawiin ni chhiar telin April ni 1 thlen nan hian ni 60 chiah a awm ta.
Mizoram mipui kuta sipai ram hlanna tura inremna ziah chungchang hi MoA ziahnaa tel chief minister Lalduhoma chuan October ni 26, 2024 khan thuthar thehdarhtute hmaah a puang a. A tawi zawngin, sipaite hian an ram luah mek atanga 39.78% an chhuahsan ang a, 60.22% an la luah zui dawn a ni. Sipai chhuahsan tur zingah hian AR Lammual bakah Quarter Guard hill complex, school area, war memorial leh Mandir te pawh a tel a ni.
Tuna hriat theih chinah, sipai ram luah chhunga mimal ram nei mi 61 zinga mi 13 te chuan an LSC an surrender tawh a, tun thlenga la surrender lote pawh, sawrkar leh central YMA chuan surrender turin an au zui reng a. Tun hnai mai (27.1.’25) pawh khan Central YMA chuan ngenna an tichhuak leh tawh a. Assam Rifles chhuahsan ramte hi mipuite tana a tangkai thei ang bera hman a nih theih nana hma la turin sawrkar an ngen a. Hun lokal zelah mimal, political party, kohhran leh pawl hrang hrang ten mahni tana remchang lo zawng lo turin an ngen bawk a ni.
Assam Rifles chhuahsan ramte hi vantlang pawimawh (public purpose) atan chauhva hman tur tih a nih angin, hemi dungzui hian Mizoram sawrkar chuan dan thar ‘Mizoram (Restriction on Use of Transferred Land) Act, 2022’ a lo siam tawh bawk a. Tuna LSC surrender lote pawh hian, an hminga ram lo dahte hi engti kawng mahin an hmang zui thei dawn lo a ni tih Danin chiang taka a sawi tawh a, chuti chung pawha LSC holder-te hian LSC an la surrender duh lo cheu a nih chuan, mipui sawrkar pawisaklohna lian tak a ni, a tih theih awm e.
April ni 1, 2023-a Union Home Minister Amit Shah-a’n Zokhawsanga Assam Rifles insawnna tur ram a hawn atanga a kum hnihna chiah April ni 1, 2025-a Mizoram mipui kuta AR ram thenkhat hlanna tur hun chhiar (April Countdown) theiha a lo awm ta hi a lawmawm hle a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More