Morgan Wallen-a’n Spotify record a siam

Morgan Wallen album thar ‘One Thing at a Time’ chuan Spotify streaming record a siam nghal der mai. He album, hla 36 awmna hi March ni 3-ah an tlangzarh a, a nikhatnaah stream maktaduai 52.29 a tling a, hei hi Spotify record, ni khat thil thua mipa zaithiam country album stream nasat ber a la ni a, kumina album tlangzarh tawhah, eng genre pawh huamin mipa zaithiam album zinga nikhat thil thua stream nasat ber a la ni bawk. Hei bakah hian album an tlangzarh niah Morgan Wallen hi US mai bakah khawvel huap pawhin Spotify-a stream nasat ber a ni bawk.
Morgan Wallen album hi a hit thei riau a, a album hmasa zawk, hla 30 awmna, Dangerous: The Double Album kha 2021-a a tlangzarh kha a ni daih tawh mah se vawiin thlengin Billboard 200 (albums) chart-ah a la lang thei a, chart ranking hnuhnung berah khan top 5-ah a la awm nghe nghe a ni.