Morgan Wallen “I’m the Problem”-in chart-ah harsatna la nei lo

Morgan Wallen “I’m the Problem”-in chart-ah harsatna la nei lo
Morgan Wallen album “I’m the Problem” chu Billboard 200 (US albums) chart-ah a No.1 a, he chart-ah ian a zawn lovin kar 12 a No.1 tling ta. Hetihrual hian Conan Gray pawhin he chart-a a tawn sân ber tum a rawn tawng a, Billie Eilish leh Taylor Swift te pawh top 10-ah an lang thar ve leh ta bawk.
Billboard 200 chart hi kar khat chhunga US-a album hralh tam dan atanga tehin chart ranking siam thin a ni a, album hralh zat chhut nan hian album tak tak hralhna bakah streaming atanga album hralhna tlukpui leh album-a hla a mal a hralhna atanga album tlukpui te belhkhawm thin a ni.
“I’m the Problem” hralhna hi a kar hmasa aiin 4%-in tlahniam mah se kar khat chhungin 1,21,000 hralh lehin chart-ah harsatna nei lovin a la No.1 thei a, 1,16,000 chu streaming atanga album hralhna tlukpui (on-demand official stream maktaduai 154.02) niin, album tak tak hralh chu 4,000 a ni a, album-a hla a mal a hralhna atangin 1,000 a tling thei bawk.
Wallen hian he chart-a No.1 kai thei album pathum nei tawhin, chung a album pathum te he chart-a an No.1 hun chhung belhkhawm chu kar 41 a tling tawh a, Adele (40) lehpelin, he chart-a No.1 nih reiah tun kum zabi chhunga pahnihna a ni ta a, Taylor Swift chiah a pha lo a, Swift hi 2000 hnuah a album hrang hrang hmangin he chart-ah hian kar 86 a No.1 tling tawh.
KPop Demon Hunters soundtrack chu 1,08,000 hralh lehin No.2 a la ni. He album hi kar kua liamta khan No.8-ah a rawn debut a, tihian tun kum 10 chhunga soundtrack album zinga he chart-a a zawna kar kua top 10-a lang leh thei hmasa ber a ni.
Conan Gray album ‘Wishbone’ chu 71,000 hralhin No.3-ah a debut a, chung zinga 53,000 chu album tak tak hralhna niin, streaming atangin 18,000 (on-demand official stream maktaduai 23.71) a tling thei a, hla mal hralhna chu chhiar tham a ni lo. Gray hi a hmain chart top 10-ah tum hnih- ‘Superache’ (No.9, 2022) leh ‘Kid Krow’ (No.5, 2020) a lo lang tawh a, tuna hi he chart-a a thlen sân ber a la ni.
Gunna ‘The Last Wun’ chu 48,000 hralh lehin No.3 atangin No.4-ah a tawlh a, Alex Warren “You’ll Be Alright, Kid” chu 40,000 hralh lehin No.5-ah bawk a la awm.
Chart No.1 pawh lo ni tawh, Billie Eilish “Hit Me Hard and Soft” chu 38,000 hralh lehin No.24 atangin No.6 a kai thar leh a, he album hi a vinyl version an tlangzarh thar a, chu chuan album hralh a tipung leh ta a ni. “Hit Me Hard and Soft” hi June 2024 thla tir chart-ah No.2-ah a debut a, kumin June thla tir chart kha top 10-a lanna hnuhnung ber niin, tunah a rawn lang thar leh ta a ni.
Chart No.1 hlui Morgan Wallen “One Thing at a Time” chu 38,000 hralh lehin No.8 atangin No.7-ah a insawn leh hret a, chart No.1 hlui bawk SZA “SOS” chu 35,000 hralh lehin No.10 atangin No.8 a kai thar leh a, Justin Bieber “SWAG” chu 33,000 hralh lehin No.7 atangin No.9-ah a tawlh ta bawk.
Chart top 10 khartu chu chart No.1 hlui, Taylor Swift “The Tortured Poets Department” niin, 30,500 hralh lehin No.18 atangin No.10 a kai thar leh ta. He album hi nikum May thla khan No.1-ah debut-in, a zawn lovin kar 17 a No.1 thei a, tunah Swift album thar tur “The Life of a Showgirl”-in boruak a rawn nei leh tan ta a, Swift album hmasa hi hralh a tikal thar leh ta bawk a ni.